E ita totu iat a essi sutzèdiu chi in su 1824 sa Sardìnnia iat scabudau a is Savòias po passai cun su Rennu Uniu? Si ddu contat Marco Corda, in su bellu lìburu Cagliari UK, Cenacolo di Ares, 2021.
https://cenacolodiaresofficial.altervista.org/-cagliari,-uk–di-marco-corda.html
Mancai siat scritu in italianu, ndi paraus s’arrogheddu afatanti bortau in sardu: unu pagu po brulla e unu pogau po biri chi si praxit – pgg. 9-12.
Sa pesadìlla (1) fiat inghitzada cussu mengianu etotu candu si-ndi fiat scidau, iat obertu is ogus e iat cumprèndiu chi no s’agatàt in s’aposentu suu praxili.
S’agatàt invècis in d-unu aposentu mannu. Comenti is ogus si fiant arrangiaus a su mesuscuriori iat inghitzau a apubai calincunu piessìnniu. Sa serranda in sa fentana lassàt passai calincunu raju lèbiu de luxi. Unu televisori arrimau in d-una consola apicada a su muru. Una mesa in s’arrenconi acanta de sa fentana. Unas cantu cadiras a ingiriu de sa mesa. Una genna a manu dereta.
‘Unu spidali’ si fiat nau ‘M’agatu in d-unu spidali’. Comenti mai podiat essi acabbau inguni? Iat circau de s’arregordai de sa dii innantis. Fiat dumìnigu?
‘Eja, ariseru fiat dumìnigu’ Luca s’arregordàt d’essi andau a su stàdiu, giogànt Casteddu-Juventus. ‘E agoa? Ita apu fatu?’. Su scurri de is arregordus dd’iant firmau unus cantu doloris chi iat intèndiu mentras si fiat furriendi.
A manu de manca unu letu. Dd’ocupàt una personi. Drumiat, in sa mellus sorti.
Àterus piessìnnius in s’aposentu: unu biaxi de scritas in ingresu, totus in ingresu. Strambecu.
(…)
S’infermera sighiat a chistionai. Dd’iat arripìtiu chi iat tentu un’incidenti, un’atumbu de fronti, po su chi si podiat cumprendi. Fiat caminendi contramanu.
S’acentu de s’infermera. Chistionàt in ingresu ma s’acentu in calincuna manera ndi-ddi beniat familiari. Sa ganamala tambeni, Luca ddi depiat preguntai amarolla aundi s’agatàt.
Iat fatu un sfortzu. “Where am I?”.
“You are in St John’s hospital, sir”.
Eja, ma aundi est?”.
“Well, Casteddu, United Kingdom”.
(1) incubo
Màgini de Valentina Panzera, FB: Cagliari vivere in vacanza, 05.07.2024
