Màgini de crobeca pigada de Sardegna Agricoltura
furriau in sardu de:
Ugo Dessy, Su tempus chi passat, Vol. I, S’annu de su messaju, Alfa Edirice, 1989, pg. 12.
www.alfaeditrice.it/shop/collane/su-tempus-chi-passat
www.ugodessy.com
Cabudanni
Cabudanni, (de su latinu: caput anni) oberit s’annu in Sardìnnia. S’incarrerat sa binnenna; in dònnia bìngia, is binnennadoris lassant su scrichilloni po is pòberus chi andant a scrichillonai. Chi is meris funt stètius de bonu coru, is pòburus de sa comunidadi ant a tenni po s’ierru una cubedda de binu fatu de “sa binnenna de scrichilloni”.
In sa coxina, in sa lolla e in sa pratza de domu s’afainant is fèminas de su messaju, faendi cunserva.
Unus cantu decàlitrus de mustu, bogaus de sa faidura de su binu, ddus coint sei-sei e ddus fùrriant a saba: sa saba, callada che marmellada, de lungi asuba de su pani e po nci cundiri is durcis de su costumu de is mortus. Intre custus, su pani de saba, pani fatu cun saba.
Is mellus gurdonis de àxina de unas cantu bariedadis, che su galopu (1), ddus acàpiant a lobas cun sa tzinniga, cotus in sa lissia nuscosa, lassaus a su soli apitzus de cannas e, a s’acabbu, apicaus in is solàrius bentulaus o in is lollas, po ndi fai pabassa. Candu est su tempus, si lìmpiat sa pabassa de su tenaxu, si spibionat e su pibioni pabassau s’allogat in su finugu aresti.
Sa figu in custa simana: birdi, niedda, castàngia, prus pitica, ma beni imprupia, dda sterrint asuba de crobis de cardilloni, apitzus de teuladas chi s’incarant a pratza, po sicai in su soli biatzu de cabudanni, atesu de is pillonis allurpius de pratza.
Diaici puru is tomàtigas, sperradas comenti si spetat e salias, si ponint a sicai asuba de tàulas incrubadas, abetendi de ddas serrai sicadas e de ddas stugiai in tianus e bùrnias (2), cun folla de lau e afàbbica.
Su frutu de sa figumorisca est in custu mesi su primu mandiari de su porcu e de su pòberu. In is annus de abbundàntzia, candu su celu ghetat àcua apustis de s’Assunta, s’ùrtimu figumorisca dd’arregollint po ndi fai marmellada. Su frutu de sa figumorisca est sustantziosu meda, arricu de tzùcuru, ma is chi ndi papant depint donai atentzioni a sa spina, tzudda microscòpica e groga chi si-nci stichit in sa peddi faendi-ndi benni arrubioris infadosus. Pruschetotu tocat a abarrai a s’avèrtia po su pisu, ca chi ndi papas in cantidadi tropu manna arrescit su carru, cosa chi, in sa manera pantasiosa de chistionai de su pòpulu, est su firmai de s’andada de corpus.
(1) in it.: uva zibibbo
(2) strexus de terra a buca lada
