Vossinnioria-su-Presidenti-a-vida!

ARRESPUSTA DE SU DIRETORI
a Vladimir Putin

de Giampaolo Pisu

Vossinnioria-su–Presidenti-a-vida! Ma it’est bessida una moda! Ma àtera genti de scriri no ndi tenit? Ita? Totu cussus chi ant scritu funt mortus! Cessumamamiatiarrori! Lessat mi tocai is… Ge no nci at a ai pensau Vossinnioria etotu?! Sa giustìtzia! Innantis Biden, ma mai m’ia a-p essi abetau de arriciri una lìtera de Fostei òmini aici, aici… mellus chi no ddu neri, ca no ia a bolli fai sa pròpiu malacabbada de cuddus àterus chi at scritu… Ita? Ddi pràxïu ca amostu unu spìritu russu chi àterus no tenint ca dd’ant nau ca tèngiu una Dàcia? Sissi ma su chi si-dd’at nau no est stètiu precisu: no est una domu ma una màchina… e no est russa ma rumena, mesu rumena e mesu francesa naraus… Mi scriit ca Vossinnioria-su–Presidenti-a-vida iat a bolli acabbai sa gherra cun s’Ucraina, ma dònnia borta chi biit a Zelenski bistiu de cassa manna naca nci-ddi pesat su sànguni a conca. E chini ddu sciit, mancai imoi ca s’Amèrica tenit presidenti nou… in paneri un’aciou… un’àteru macu bellu! Custu dd’at nau Fostei no deu! Mi scriit po mi nai ca dd’at arròsciu de essi cunsiderau unu presidenti ditadori sena de coru e sèmpiri prontu a strecai is chi si ponint contras a Vossinnioria-su presidenti a vida, e ca iat a bolli lassai unu bellu arregordu de sei in sa conca de sa genti, ca mi cunfessat ca asuta asuta est bonu che un’arrogu de pani e ca dònnia mangianu candu si-ndi pesat ddi tocat a si ponni custa carota[1] de òmini forti, ca in custu mundu no fait a si fai biri de coru moddi, custu si-ddu podit permit scèti su Paba e su Dalai Lama. E sighit: “o su diretori, ma biu dd’at a chini guvernat su mundu oi?: Trump, Orban, Erdogan, Netanyahu, Milei… depu sighiri?”

E ita Ddi potzu nai Vossinnioria-su–Presidenti-a-vida? Ca nci teneus presidentis chi funt “sa fini de su mundu?” Tentu contu ca de is giorronalistas chi at scritu Vossinnioria no nd’at abarrau biu unu, e ca deu seu ancora giovuneddu, ddi potzu scéti nai ca tenit arrexoni e ca seu pensendi diaveras de cambiai traballu, connau miu est circhendi manorbas in s’impresixedda edili cosa sua, ca comenti narat su dìciu: “Mellus unu molenti biu che unu dotori mortu!”

Ditadoriamenti suu                                 Su Diretori

[1] maschera

Custa lìtera, che is chi ant a sighiri, est sa torrada de su Diretori de unu giorronali (no de custu chi seis ligendi) a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri fai una torrada unu pagheddu irònica e brullana…