ARRESPUSTA DE SU DIRETORI
a Donald Trump
de Pàulu Pisu
Vossinnioria su Presidenti nou, ma ge no si-dd’at ai donau Putin s’indiritzu email cosa mia? O Biden? Permitat-mì, ma Fostei est Presidenti duas diis cun cras e agatat su tempus de scriri a mei? Ma cun totu su chi at nau in campànnia eletorali ca depit fai! Comenti mi permitu? MAESTÀ depu nai candu fueddu cun Vossinnioria? Perdonit, no ddu sciia… Chi ddu torru a fai mi fait curri cuaddus? Ge no ddu fatzu prus, de imoi innantis candu Dda scriu dd’ap’a fai ingenugau e basendi una fotografia de Vossinnioria MAESTÀ. Ma comenti at fatu a mi scriri in sardu? Ita? Gràtzias a su programa de intelligèntzia artifitziali chi dd’at fatu s’amigu Elon Musk? Cussu drogau? Sa giustìtzia! Ge ddu sciu ca po Vossinnioria MAESTA’ est stètiu unu giogu su binci is eletzionis, cun su nòmini chi tenit! (1) Ge no at a ai fatu cartas frassas? Ma insaras est pròpiu de TRAMPulas (2) malas!
Mi narat ca de cras in Amèrica no bolit prus biri cosa chi no siat americana scheta, scéti su Meloni naca ddi praxit e at a permiti: Meloni e Melania… Duncas nudda prus zigarrus cubanus, whisky scotzesu, parmigianu reggianu e pecorinu romanu, sushi, wurstel, vodka… e nci bolit bogai a sonu de corru a totu is chi no funt americanus originalis schetus e sinzillus a su 100%… ma pròpiu seguru seguru nd’est? Mi permitu umilmenti meda de Ddi arregordai ca is americanus schetus funt is peddarrùbia, “pellerossa”, is àterus funt totus de orìgini europea, totus clandestinus, po su prus inglesus, assumancu a incarreru… ladronis intraus a fura ledit! COMENTI MI PERMITU?! Chi no nd’arretiru su chi apu nau naca mi fai ghetai una bomba cun su nòmini miu? Perdonit fia brullendi: nd’arretiru fintzas su chi apu pensau! A contus fatus eis fatu beni a ddus sperdi a cussus apache, sioux, navajo e cumpangia cantanti, ca mancu si sciacuànt is peis… e sempri seghendi su culu cun Manitù e totu fiant!
Imoi si-ndi pinnicat sa Groenlàndia e su canali de Pànama e ddus donat in fèudu a is amighixeddus cosa sua! Po su Cànada at a biri… E custu est scéti po incarrerai… E arguai chi calincunu murrungit! IN CUSTA GIUNGLA CHI SI NARAT MUNDU, CHI SI SCÌPIAT CHINI EST IN PITZUS DE SA CADENA ALIMENTARI! Vossinnioria MAESTA’ est pròpiu unu lioni, is lìnguas malas narant fintzas “co-lioni”… E bivat petròlliu, carboni e gas, e chi no ddi seghint sa conca cun sciollòrius de ecologia, incuinamentu e tontesas aici: totu scimpròrius postus in giru de comunistas e caghineris. Ita? Chi ddi segant sa conca meda meda fait fai una bella astronavi manna manna a s’amigu Elon Mask (Maskellon po is amigus) e nci-ddus portat a Marte! E chi deu no dd’acabbu de fai umorismu de tres arrialis nci portat a mei puru! Gesugristu miu! Perdonu! Mea culpa, mea culpa, mea maxima culpa!
Maestosamenti suu Su Diretori
(1) Trump bolit nai BRISCOLA ma fintzas TROMBA no si sciit chi verbu o sostantivu…
(2) Trassas
