Màgini: George Orwell prus o mancu in su 1940, de Wikipedia.
GEORGE ORWELL 1984
CAPÌTULU 1 – parti 3
The Ministry of Truth contained, it was said, three thousand rooms above ground level, and corresponding ramifications below. Scattered about London there were just three other buildings of similar appearance and size.
Nanca su Ministèriu de sa Beridadi contàt tremila aposentus paris a terra e su pròpiu tanti asuta de terra. Spartus in Londra ddoi fiant scéti àterus tres palàtzius chi dd’assimbillànt siat po bisura che po manniori. Custus faiant parri piticheddeddas piticheddeddas totus is àteras domus, tant’est ca de sa cobertura de is apartamentus de su Victory Mansion, cun sa pròpiu castiada si podiant biri totu e is cuàturu.
Ddoi fiat sa sea de is cuàturu Ministèrius chi si partziant totu s’aparìciu de su guvernu. Su Ministèriu de sa Beridadi chi si ocupàt de is novas, su sprèviu, s’educatzioni e is artis. Su Ministèriu de sa Paxi, chi si ocupàt de gherra. Su Ministèriu de s’Amori po fai arrespetai sa lei e s’òrdini. E su Ministèriu de s’Abbundàntzia, responsàbbili po is chistionis econòmicas. Is nòminis insoru, in sa Neolìngua, fiant: Miniberidadi, Minipaxi, Miniamor, Miniabbun.
Su Ministèriu de s’Amori fiat su chi faiat prus a timi. Me is murus no ddoi fiant fentanas. Winston no fut mai stètiu in su Ministèriu de s’Amori, no si fut mai acunortau a si-ddoi acostai nimancu a mesu chilòmetru. Fut unu logu chi no faiat a ddoi intrai, foras che po chistionis de traballu, e insaras puru scéti passendi in d-unu labirintu serrau cun filu ferru spinosu totu troghillau, genna de atzàrgiu e mitralliadoris cuaus. Fintzas is bias chi portànt a is tressas, postas a parti de foras, fiant castiadas de guàrdias cun faci de gorilla, bistidas cun uniformis nieddas, armadas cun fustis grais.
Winston si fut furriau de suncunas. Iat pigau una bisura de otimismu assèliu chi fut mellus a tenni candu si castiàt su schermu. Iat atressau s’aposentu finas a sa coxinedda. Bessendindi de su Ministèriu a cuss’ora de sa dii iat sacrificau su pràngiu in sa mensa, si-ndi fut acatau in coxina ca no teniat cosa de papai, sceti un’arrogu mannu de pani nieddu chi iat a ai dèpiu allogai po su murzu de s’incras. Nd’iat calau de su parastàgiu una butìllia de lìcuidu chena de colori cun d-una eticheta bianca anca ddoi fut scritu “Gin de sa Vitòria”. Teniat unu fragu de mexina, ollosu, che s’àrculu cinesu. Winston si-ndi fut ghetau giai unu cicaroni, si fut poderau po sa scutullada e nci-ddu iat calau totu a un’acirrada coment’e chi fiat mexina.
Totu a una borta si fut fatu arrùbiu che su fogu, iat bogau àcua de ogus. Sa cosa fut che àcidu nìtricu, e in prus calendi-nce-ddu, a unu ddi parriat ca fiant scudendi-ddu a fusti a spistiddadura. E mancai, su momentu infatu, s’abruxori a brenti ddi fut passau e su mundu iat incarrerau a ddi parri prus allirgu. Nd’iat liau una sigareta de unu pachetu strecau anca ddoi fut scritu “Sigaretas de sa Vitòria” e cun pagu coidu dd’iat posta conca a bàsciu e aici ndi-ddi fut arrutu su tabacu totu a terra. Cun sa segundu ddi fut andada mellus. Si-ndi fut torrau a s’aposentu e sètziu si fut in sa mesixedda chi fut a manu manca de su schermu. De su cadàsciu de sa mesa nd’iat bogau unu strexu porta-pinnas, tinteri e unu cuadernu grussu a costa arrùbia e sa coberta a colori de màrmuri.
Su schermu in s’apostentu po calincuna arrexoni no fut postu in su logu suu. In logu de essi postu, comenti depiat essi, in fundu a su muru de innoi si podiat biri totu s’aposentu, fut postu in su muru prus longu, a s’àtera parti de sa fentana. A una parti ddoi fut una genia de nìciu pagu fundudu anca Winston fut imoi sètziu, innói, candu iant fatu is apartamentus, est capassu boliant fai stantis po lìbburus. Setzendi in su “nìciu” e furriendi beni is palas, Winston podiat abarrai foras de sa bisuali de su teleschermu. Ddu podiant intendi, ellus, ma po cantu abarràt inguni no ddu podiant biri. Fut fintzas comenti fut fatu s’aposentu chi dd’iat consillau su chi fut po si ponni a fai.
Sighit…
