Màgini: William-Adolphe Bouguereau, Sa binnennadora, 1875.
Su mundu furriau a francas assusu.
Sa vida in contus e contixeddus e su tempus currit e fuit.
de Marcu Coghe.
Su contu de Marcu – ddi narat Stèvini Cherchi in sa Prefatzioni – si strobeddat lèbiu, in su passai de su tempus “chi currit e fuit” (…), scritu imperendi una lìngua pretzisa e pretziosa, bella, chi nascit che a fueddada de su logu suu (dialetu de Ùssana), ma chi arrennescit a si-ndi pesai a lìngua berdadera, sarda campidanesa literària, chi si fait universali e fàtzili a cumprendi po totu is sardus.
Paraus s’arrogheddu de scritu afatanti, pigau de “Contus e contixeddu de friscura”, ppg. 65-66.
“Tziu Pepùciu boliat contai ita fiat acontèssiu a tzia Antioga chi depiat fai is paperis po sa pensioni e eriseru a mengianu si fiat parada in municìpiu.
– Ddu potzu strobai su sìndigu? M’iat a depi firmai is paperis po sa pensioni.
– Prexeri de dda torrai a biri, tzia Antioga! Alloddu, firmau e timbrau!
– Cantu ddi depu su sìndigu?
– Nudda de nudda, brullendi est? Sceti ca is paperis ddus depit firmai su dotori puru!
– Sissi, Deus si-ddu paghit!
In d-una torrada de gòcius, tzia Antioga lompiat a s’ambulatòriu.
– Comenti stait, tzia Antioga?
– Gràtzias a Deus is maladias no mi zùmiant mancu me is origas, su dotori! Seu bènnia poi is paperis de sa pensioni.
– Fatzat a biri a mimi: bla… bla… bla… beni… beni… beni… sissi…sissi… sissi. Comentechisiat, a s’acabu sa firmixedda mia. Totu a postu, tzia Antioga! Mi depit cincuxentus francus!
– Ojamomia, su dotori! Po unu scarràfiu de firmixedda, cincuxentus francus! Est a ndi furai su dinai!
– Iťest arrebotendi! Ma ddu sciit ca po ponni custa firmixedda deu nci apu postu prus de dex’annus de stùdiu!
– Ancavunnàscïu, lampu de dotori! Ma chi fustei fiat conca de burricu depu pagai deu!”.
www.alfaeditrice.it/shop/contemporaneo/su-mundu-furriau-a-francas-assusu/
