Figumorisca apu papau

Màgini de Cinzia Novati, in FB Solu in sardu, 25.09.2023

Figumorisca apu papau – primu parti

de Toto Putzu

Unu componimentu in rima de su costumu chi s’arremonat un’amonestu de importu! (1)

Fillu burdu, arregoltu a vida liada,

Scrutzu e scorriau, fiant tempus cosa ‘e timi,

in sa sfortuna custa m’est tocada

de m’arresci su carru pròpriu a mimi.

Torrada:

Figumorisca apu papau

e su carru m’est arrèsciu

si scieis cantu m’est incrèsciu

po debàdas apatau.

Fiat in austu, po Santa Maria,

a piciocheddu fadia su procaxu,

fàmini a conca ‘e genugu e carestia,

nudda in sa bèrtula e nudda in su scraxu.

Torrada

De orbescidroxu sa figumorisca

a is primas àcuas groga e ceratza

in sa cresura fìat luatza e frisca

e ndi-dd’apu scutu medas a pudatza.

Torrada

Scabùlliu mi-ndi seu unu muntoneddu,

mundau cun pastura de sa spina

e in punta de lepa croxu e naseddu

donu a stravàciu a una madri angiadina.

Torrada

Sa primu e sa segundu ingùrtiu nc’apu,

agoa de tres e cuàtru, sa matuca,

e poi pitica e manna mi-ddas papu

calendi-mì is salias a corru’e buca.

Torrada

De cantu fia asuriu mancu matziadas

Mi-ddas apu, a una a una bella sana

a trassa de madri ingurtendi a mufadas,

ca de apetitu fia bellu e de gana.

Torrada

Fortzis fiant trinta, fortzis fiant coranta,

pèrdiu su contu apu de su cùcuru,

mannas che melas pariant ca fueddànt(a)

simbuosas e durcis che su tzùcuru.

Torrada

Ma su fàmini est cosa mala, lampu,

e nemus pensat, candu est afamiu,

ca sa buca est lada, però su stampu

de asuta est sentza ‘e dentis e pitiu.

Torrada

Fut làstima a spudai fintzas su pisu

perdendi tempus, e aici mi-ndi satzu

senza ‘e pani a ingaùngiu, e mi lisu

s’amumùngiu de su primu mustatzu.

Torrada

Acirradas de binu a crocorìga

crocobendi avatu nc’apu ingùrtiu

e stèrriu brenti a susu in sa biga

cuntentu che un gatu mi-ndi seu fùtiu.

Torrada

Ma sa dii apustis che una madri prìngia

su scinitzu fut meda e no pagu,

scratzonau mi seu in d-una bìngia

po debadas spremendi a pagu a pagu.

Torrada

Su lunis nudda, su martis mimancu,

deu fìa crependi de su sfinimentu,

su stògumu a currùxus de ‘ònnia fiancu,

scrafìngiu, e su matzàmini in trumentu.

Torrada

Scrafìngiu in foras e aintru unu papìngiu

in su scraxu e in su centupilloni

de s’unfladura e de su murighìngiu,

strantaxu o stèrriu asuba ‘e su cilloni.

Torrada

Spantamacus ca m’est arrèsciu su carru,

no sciu ita manu mi donai in prantu,

tra mimi pensu e timu ca nci abarru,

ca m’ant a ponni fintzas s’ollu santu.

Torrada

Mancu m’interrant in su gimitòriu,

mi lassant a pudesci che unu spegu

ca costat su baullu, e s’ofertòriu

est po sennoris in latinu e gre/gu.

Torrada

Balla, si-ddu naras sa mala sorti!

Nàsciu stravàciu, unu caghetu ‘e nudda

a trèxi annus giai spèrdiu de sa Morti

po carru arrèsciu Pìllimu Cibudda.

Torrada

A chini no mi creit chi si-ddu provit,

sa spinta s’est siddada a mesu ingiassu,

no scotzat mancu a picu e prus no movit

su turroni tostau che truncu ‘e ollastu.

Torrada

Balla no nci fut trassa a forza ‘e spremi,

su tubu ‘e scàrrigu fut arribiu,

e deu mi trocia comenti ‘e un bremi

sudau piu piu prangendi che un pipiu.

Torrada

Su mali ‘e corpus e is cagarèddas

sunt cosas lègias e malas de no crei,

ma est mali e peus candu ti scodrèddas

spremendu sentza de podi fai chechei.

Torrada

Si dda scidiais s’invìdia cosa mia

biendi is madris biadas in sa stua

comenti is bassas mannas de onia

si-ndi fadiant sentza de bubua.

Torrada

Ma a mimi maladitu che unu pidu,

mancu unu scòrriu in su sfortzu estremu

mi-ndi bessiat sentza de torrai suidu,

cunvintu ca in tres diis mi morremu.

Torrada

No andàt a innantis, no torràt asegus,

spingendi aintru e a foras oras e oras

comenti candu si abortit un pègus

mortu angendi a conchitedda in foras.

Torrada