E su carru m’est arrèsciu

Màgnini pigada de pixabay

Figumorisca apu papau – segundu parti

(1) de Toto Putzu

A sfortzu acòrru is porcus in sa urra

e incòsciu a cuaddu in circa ‘e agiudu in bidda,

ma si-ddu sciit Deus su pistu ‘e s’ègua murra,

in su paneri assachitendi-mi-dda.

Màgini de Marco Cannas, FB, Solu in sardu, 15 10 2021

Torrada:

Figumorisca apu papau

e su carru m’est arrèsciu

si scieis cantu m’est incrèsciu

po debàdas apatau.

S’ègua fut vìschida e punnàt a stadda

e tenta a passu fut tropu su pistu

pro is nàdias mias arrùbias che aragadda,

e no acudia tzerriendi a Gesugristu.

Torrada

Po cuai bregùngia fea a domu no andu

tra is serbidoras e sa meri mia

ca si-nd’arriint e gridant su bandu,

e ni ananti ‘e genti in farmacia.

Torrada

M’acunortu, e bregùngia mi-nd’est partu

de m’amostai in domu ‘e levadora

che una picioca pròssima a su partu

ananti ‘e issa cun su culu in fora.

Torrada

Ma a cussa santa fèmina ringràtziu

pro tantu stentu, poita a modu miu,

de asegus, no de ananti, in pagu spàtziu

fut mali e peus chi essi parturiu.

Torrada

A scràmius lègius no fut su picinu

meghendi ‘e s’incarai, ma fut su babbu,

cun s’ostètrica acanta mia a stechinu

a tzappu ‘e strexi in manu e su lavabu.

Torrada

Credia ca si-nd’est pràndia ‘e stuvonai,

scedada, cun s’achicaieddu ‘e linna,

e deu siddendi is dentis, agiumai

mi moria in manus de sa sennorinna.

Torrada

Issa at(i) stragatzau mes’ora manna

ca fu grussu e tostau che unu truncheddu,

e cussu partu sentza ‘e ninna nanna

m’est costau sa promissa ‘e unu porceddu.

Torrada

Sa paga de su strobu a àcua callenti,

de afumentus, brèbus i enteroclismu

po allebiai s’abbruxori de sa brenti

e una purga ‘e ollu règiu ‘e su Fascismu.

Torrada

Bessidu mi-ndi seu de domu ‘e issa

curvu e scadriu a passu lentu e tardu

ca in bàsciu mi intendia spinas de lissa

pungendi in nàdias peus che spina ‘e cardu.

Torrada

A imperrai torra s’ègua no fut brulla,

deu chi prima nci pistincamu asuba

che unu pisitu, ca centu e una agulla

moi m’intendia, tentu strintu a sa giua.

Torrada

Cussu tretu de bidda a su porcili

est stètiu unu scramentu chi m’amentu

po cantu bivu fissu che un’obili,

ca mi-nd’assustu a su pensamentu:

Torrada

A sa nua sentza de stafas ni sedda

sa schina ‘e sa puddeca fut che lama

acutza che sa crista ‘e una sparedda,

e deu bidia sas steddas de sa sprama.

Torrada

Un niu de espis ferràinas a scussura

Mossiànt arrabiosas e abramidas

de parti ‘e palas aundi est sa natura

e no tenèmu assentu pro duas cidas.

Torrada

Ca fintzas in su sonnu mi bisamu

Prenu de musca cuaddina in su paneri,

o a infrissidas, chi mi-ndi scidamu,

puntu de sa sua de su sabateri.

Torrada

Po andai ligeru ‘e corpus in sa foxi

sceti minestredda burda a mindigu

diis de digiunu fatu mi-nd’appu doxi

làngiu che perda e marriu che un fustigu.

Torrada

Cun totu is murenas infiamadas

e scuartaradas che vulcanu allutu,

s’ollu ermanu serbiat e po debadas

e tenia àsiu frighendi-mì strutu.

Torrada

A didu dd’intendia sentza ‘e ddu biri

su bùngiu arrùbiu che sa crogorista

de unu caboni e serra ‘e pibitziri

arrungiosa e acutza che s’arista.

Torrada

Apustis sa mortalla ‘e su fogali

e is cascialis non nc’est mali arrabiosu

che una berrina in su pertusali

de su culu, profundu e marigosu.

Torrada

A mi-ndi strantaxai de sa stòja

po atendi is porcus fut unu suplìtziu,

fintzas s’idea de mi pungi a rasoja

mi beniat, perdendi su giudìtziu.

Torrada

A pruna e pira cota e semolinu

a prandi e a cena, o a lati e freguledda

agiudamu su codru e s’intestinu

cun sa sperantza torra ‘e fai lecuedda.

Torrada

Ma a flachèsas, moddi e a pagu gana

no ndi giuamu a nudda in su traballu,

e su meri a cussa cara strana

mi sprìcuat, scòviu totu poi batallu.

Torrada

Chesciau s’est in domu sua cun sa pobidda

e is fèminas pigau nd’ant arremoni,

aici arrìsia si-nd’est totu sa bidda

insaras postu m’ant(i) in can/tzoni.

Torrada

Ma salvau m’at sa vida cussa purga

e oi sa figu dda segu a scarteddus

e a cadinus lestru cun cannuga

sceti po porcus, madris e porceddus.

Torrada

Gràtzias a Deus torrau ndi seu a logu,

ma in nomini ‘e Maria e de Gesusu

mai in sonnu no mi torrit, mancu a giogu,

figumorisca in vida mia mai prus(u)!