Vossinnioria sa Presidenti stimada.
E nosu drìnghilli sa mesu cannedda! Gei ddu sciit ca mi onorat sèmpiri meda candu scriit a mei ùmili diretori de giorronali, ma imoi est pighendi-si-dda a fìtziu!
Pregontat a mei ita iat a depi fai Fostei po arresolvi sa chistioni de sa sanidadi. Incapas custa borta calincuna cosa dda iat a podi fai Vossinnioria po mei, ca seu otu mesis abetendi po una ecografia a sa brenti. Pensit ca apu tzerriau a su c.u.p. Centru Ùnicu de Prenotatzioni e m’ant indiritzau a un’àteru nùmeru po prenotai a su c.u.p.! No at cumprèndiu? No seu seguru da dd’ai cumprèndiu mancu deu. Provu a ddu nai mellus. Apu fatu su nr de su c.u.p. e sa picioca chi at arrespustu m’at nau ca cussu fut su pre-cup, e ca m’iat a ai postu in lista de abetu po podi fueddai cun s’àteru c.u.p. Ma no mi depia bisai ca nci iant a essi bòfius assumancu tres mesis (sceti po fueddai po prenotai! E paiscì cantu tempus po prenotai). Issa m’at fintzas nau ca chi fut cosa apretosa fut mellus a mi fai arricoverai o andai a una strutura privada… A pagamentu… Inguni s’èsàmini mi-ddu iant a ai fatu luegus! S’àtera cosa chi podia fai fut su de andai a crèsia e pregai… Mi nc’est scapau s’arrisu pensendi a una brulla, ma issa sèria sèria, de chi apu acabbau de arriri, m’at nau tzaca tzaca “S’arrisu de s’arenada!” e m’at serrau su telèfunu in faci.
Ma comenti stocada est custa chistioni?
Vossinnioria mi narat ca is dotoris funt pagus e medas de custus pagus naca preferint a si-ndi andai a traballai foras de Itàlia o cun su privau ca custu pagat mellus! Perdonit ma mi benit de nai: “e cancaraus funt insaras de ndi fai laureai de prus de giòvunus boghendindi su “nùmuru serrau!” a culu totu cagau ddus agatint! Perdonit su sciogu! Comenti? Sa Mertzei mi narat ca sa Regioni no tenit poderi perunu in s’universidadi, ca custa dipendit de su ministèriu. No contaus nudda mancu inguni? Ita? Nudda nudda no ca incapas chi bolit sa RAS podit arrangiai is aposentus universidàrius e mancai ndi segai s’erba de is giardinus: sa pròpiu cumpetèntzia chi tenint comunus e provìntzias cun is àteras scolas! Lampu!
A dònnia modu fatzat su prexeri e prenotit-mi-dda, ca seu seguru ca a Fostei custu no si-ddu podint arrefudai. Ddi mandu po posta eletrònica s’arretzeta de su dotori de famìllia.
Deus si-ddu paghit e si-ddu torrit in saludi
Maladiamenti suu Su Diretori
