A sa presidenti de sa Regioni Sarda – chistioni: speculatzioni energètica 5
de Giampaolo Pisu
Sèmpiri onorau de arriciri una lìtera de Vossinnioria, e ita àtera cosa. Ddi potzu nai imoi ca a mi scriri si-dd’at pigada a fìtziu? E sèmpiri avatu de sa chistioni de sa SPEINCULATZIONI ENERGÈTICA, imoi Fostei puru apu biu ca dda tzèrriat aici! Amitit ca s’energia chi iant a produsi totu custus impiantus chi bolint fai iat a bastai po giai 50 millionis de personis, sèmpiri crescendi funt! Su mesi passau fiaus scéti a 20 (“scéti” tanti po nai!), chi sighit aici lompeus a 100! Aromaba! Ita? Berus est ca chi ponint totu cussas pàlias eòlicas iaus a podi promovi sa faina “adotta una pala!” Ancu ddis-si bèngiat gana mala!
No sciit comenti fai po custas aree idonee? Funt faendi-dda amachiai? Mi narat ca est pensendi de si furriai a sa volontadi abbetiosa e prevaricadora de su Stadu italianu! Ma diaderus est narendi? Ge no at a bolli decrarai s’indipendèntzia! Mancai in lìngua sarda? Est ligendi-sì cussa americana e furriendi-dda in nuoresu? E esèrcitu sardu ndi teneus? Ita? Est pensendi de fai sa “tzerriada a is armas” de su corpus de is Barracellus e de is Guàrdias Forestalis!” E ge no at a bolli “schierai” sa gloriosa flota navali de is FASSONIS de su Sinis puru? Sustènnia mancai de sa fanteria scurtza de Crabas?
Mellus iat a essi, chi scéti faiat, a sercuestai is medas basis militaris chi nci teneus in sa terra nosta, cun totu is armas chi ddoi funt aìnturu, àteru che Stadu italianu iaus a podi binci! Ma no at pensau, innantis de fai unu passu aici mannu, a s’agiudu de is parlamentaris sardu? Funt pagus ma… Ita? Mi narat ca no si-nd’est prus intèndiu unu! Naca si funt ghetaus totus a malàdius? Essutiàulu! Insaras depit essi maladia incuràbili: che sa chi trasmitint is speinculadoris!
Indipendentementi suu Su Diretori
Custa lìtera, che is chi ant a sighiri, est sa torrada de su Diretori de unu giorronali (no de custu chi seis ligendi) a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri fai una torrada unu pagheddu irònica e brullana…
