Màgini: Dirk und Daniël van Oosterhoudt, de annu disconnotu (www.meisterdrucke.it).
Candu is bèstias certant che òminis
de Ottavio Congiu.
Su crabu e su burricu
Po si-ndi brullai, unu crabu, iat saludau
aici unu burricu: “In bonora corrudu!”.
Ma su bestiou, insà no si-ndi fiat incurau
e a pasci oru ‘e sa cresuri sulenu e mudu,
sighiu iat. Pustis ai arresigau
su coromeddu de unu gureu burdu,
de suncunas si fiat furriau
e aici arrespustu iat a su brabudu:
“Na’ montraxu, in su sprigu ti ses mirau?
T’arremonu ca ses tui becu futudu,
incoronau de corrus e apaliau,
fengiosu, fraitzu sena ‘e còidu
e po essiri lingua mala ses famau.
Ascurta-mì duncas pegus lingudu,
po su beni tuu, lassa luegu su cungiau,
si no bolis provai cantu seu colludu.
