ARRESPUSTA DE SU DIRETORI
a Donald Trump3
de Giampaolo Pisu
E nosu drìnghilli! Vossinnioria Maestà! Mancu su chi dd’apu nau in s’ùrtima arrespusta dd’at scramentada? Comenti? No at agatau in perunu ditzionàriu ita bolit nai ‘Fica-si-nci in sa bassa?’ Ah Mellus aici ca de chi m’est passau s’arrennegu, unu pagheddu mi-ndi seu pentiu de si-dd’ai scritu, ca seu ancora giovuneddu po dd’acabbai spachendi arroca in Marte o in sa piscina de Vossinnioria papau de is piscicanis… Vossinnioria Maestà bolit sciri de mei ita ndi pensu chi ndi pinnicat sa Sardìnnia puru po ndi fai su de 53 Stadus americanus? Ma no fiant 50? Ma ita at giai aciuntu Cànada e Groenlàndia? Sa giustìtzia!.. Ita ndi pensu? Mi parrit una tontesa! Colònia italiana o americana? Su primu cunditzioni dda connosceus giai, no ndi seus sanaus, no ndi seus mancu mortus E ita s’iat a donai po bessiri americanus? No apu cumprèndiu una cibudda? Est a su Stadu italianu chi iat a provai a cumbinci e no a sa Sardìnnia: «E de candu detzideis calincuna cosa in domu de bosàterus?»
Aici mi narat? Incapas tenit arrexoni! Aciungit ca:
«A bosàterus s’iat a praxi fintzas a ponni a una parti sa bandera cun cussus cuàturu chi mancu bint(i) ca parrit un’arrellògiu firmu a is tres e coranta. Iais a fueddai americanu in logu de italianu, e cantu nc’iais a ponni? De seguru prus pagu de cantu seis ponendi-nci a nci scavuai su sardu! In d-unu pratrefìlliu besseis totus americanus a cingoma in buca! Nd’iaus a torrai a fai una bella basi po sotomarinus nuclearis, su logu ddoi est giai; in prus me is medas basis militaris chi ddoi teneis giai iaus a aciungi unas cantu postatzionis po lanciai bombas atòmicas, a sa faci de cussu conca de cibudda de Putin!
Torrat acatu! E ita iat a cambiai po nosu? Scéti bandera, lìngua e cingomma?
Cessumamamiatiarrori! Ancu Ddu currat Maumetu!
Ma ddu sciit Vossinnioria Maestà totu is bellesas chi nci teneus? Mari, montis, nuraxis… Amitit de no nci essi mai beniu e de no sciri mancu ita funt custus nuraxis. Ita Ddi donaus po s’interessamentu? Arratza de faci de sola! Bruvura! Faeus diaici, chi benit aprontaus unu bellu pràngiu in onori Suu: proceddu amurtau, frègula cun còciula, crannatza, binu nieddu chi callat in unga. Aciungeus Meloni, Melania dda bitit Vossinnioria, e sigumenti custu est tempus de cosa nodida de sartu, ddi faeus tastai gicoja, gureu e cordolinu, ma a contus fatus Vossinnioria Maestà mi parrit chi bollat prus che àteru SPARAU!
Colonialmenti suu Su Diretori
Custa lìtera, che is chi ant a sighiri, est sa torrada de su Diretori de unu giorronali a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri de fai una torrada unu pagheddu irònica e brullana…
De sa Gazzetta del Medio Campidano
