Màgini: 1984-Big-Brother, pigau de su fumetu 1984 The comic di F Guimont, 2004 – Wikipedia.
GEORGE ORWELL
1 9 8 4
CAPÌTULU 1 – parti 1
It was a bright cold day in April, and the clocks were striking thirteen. Winston Smith, his chin nuzzled into his breast in an effort to escape the vile wind, slipped quickly through the glass doors of Victory Mansions, though not quickly enough to prevent a swirl of gritty dust from entering along with him.
Fut una dii de Abrili lìmpia e frida, e is arrellògius fiant tochendi sa una. Winston Smith, cun is murrus afundaus in peturras po circai de s’apigai de su bentu fridu, nci fut imbucau abellu abellu in is gennas de imbirdi de is apartamentus de su Victory Mansion, mancai no aici allestru de arrennesci a no fai intrai cun issu unu cuaddu de prùniu e arena.
De su liminaxi s’intendiat su fragu de càuli a buddiu e de tapissus bècius e sfilicitaus. In fundu ddoi fut unu manifestu colorau, tropu mannu po essi apicau aìnturu, dd’iant apunciau a su muru. Ddoi fut pintada una faci manna manna scéti, lada prus de unu metru: sa faci de un’òmini de unus corantacincu annus, a mustatzus mannus e nieddus, grusseri de bisura ma praxili. Winston iat pigau sa scala. No faiat a pigai s’ascensori. Fintzas me is diis bonas funtzionàt pagu, e a de dii mancàt sa currenti elètrica. Faiat parti de su progetu econòmicu po s’aprontai po sa Cida se sa Tìrria. S’apartamentu fut a su de seti pianus, e Winston, chi teniat trintanoi annus e una liaga varicosa a s’ossu arrabiosu estu, nci pesàt abellu abellu, firmendi-sì fatuvatu po si pasiai.
In dònnia pianu de sa scala, pròpiu ananti de s’’enna de s’ascensori, unu cartelloni cun sa faci manna manna ddu castiàt de su muru. Fiat una de cussas fotografias tiradas po chi si sigant is ogus candu si moveis. SU GRANDU FRADI BOSI CÀSTIAT, naràt sa scrita posta in bàsciu. Aìnturu de s’apartamentu una boxi druciasta ligiat unu listàrgiu de cifras chi pertocàt in calincuna manera sa produsidura de sa ghisa. Sa boxi ndi beniat de una placa de metallu allonghiada, che sa de unu sprigu annapau, chi faiat parti de su muru a manu dereta.
Winston iat girau unu interrutori e sa boxi si fut abasciada pagu pagu, ma is fueddus ge sighiant a s’intendi sèmpiri crarus crarus. Custu ordìngiu (ddi narànt teleschermu) si podiat abasciai ma mai studai. Fut andau conca a sa fentana, una figura pitichedda e dilicada, su langiori fut postu in ispicu de sa tuta asulla chi fut s’uniformi de su Partidu. Fiat a pilus brundus brundus e a cara unu pagheddeddu sanguìngia, sa peddi arresigada de su saboni arrungiosu e lametas ingurdas de diora, e de su frius de s’ierru apena acabbau.
In foras, fintzas atressu de is imbirdis serraus de sa fentana, su mundu parriat fridu. In bàsciu, in sa bia, su bentu mòlina mòlina furriotàt su prùini e sa paperalla, e, mancai su luxentori de su soli e su celu lìmpiu e asullu, perunu ogetu parriat torrai su colori suu, foras de is cartellonis apicigaus in dònnia logu. Sa cara a mustatzus nieddus castiàt de dònnia furrungoni. Ndi-ddoi fiat pròpiu unu in sa domu a faci. SU GRANDU FRADI BOSI CÀSTIAT, naràt sa scrita, candu is ogus nieddus castiànt a infrissidura is de Winston.
Prus in bàsciu, in sa bia, un’àteru cartelloni straciau a una parti, fut atzàpula atzàpula po su bentu, coberrendi e scoberrendi su fueddu INGSOC. Atesu un’elicòteru bolàt de una cobertura a s’àtera, e si-ndi abarràt suspèndiu po una scutixedda che musconi, e agoa pistincàt furriendi conca a àteru logu. Fiat sa scuadra de politzia chi bugonàt me is fentanas de sa genti.
A dònnia modu is scuadras no contànt.
Sceti sa politzia de su pensu, sa Psicopolitzia, contàt…
sighit…
