Màgini: Thomas Cole, su bisu de s’architetu, 1840 (1)
E torra una arrepentina de Antoni Nàtziu Garau: “Su sentidu de sa vida” chi at pigau su de tres prèmiu in Flussio, “S’isciareu – Augusto Piras” e custa est sa motivatzioni:
“Forsis pro sos òmines a iscobèrrere “su sentidu de sa vida” at a restare semper unu bisu ebbia, che “candu s’àcua a punta a susu / at a curri in dònnia monti”, però su poeta nostru Antoni Nàtziu Garau non s’arrendet a s’aura umana e in custa arrepentina, rica de imàgines poèticas, mustrat su bonu ingèniu suo e sa fantasia, cun versos chi invitant a cantos de ispera” (Tore Senes).
SU SENTIDU DE SA VIDA
Arrepentynaton – Arrepentina a sa dereta cundida de adynaton
Candu s’àcua a punta a susu / at a curri in dònnia monti,
e sa faci e su fronti / s’ant a biri a parti ’e schina;
candu custa arrepentina / s’at a fai universali,
e, sena ‘e perunu mali, / s’òmini at a bivi in paxi;
si sa terra ‘e su nuraxi / no prus ìsula at a essi;
candu eus a favoressi / s’amigàntzia e s’arrespetu,
sena ‘e tìrria ni dispetu / s’eus a sciri cumportai;
abetendi a si furriai / su desertu a giardinu,
innui dònnia beduinu / podit pasci su bestiàmini;
candu is pipius su fàmini / no dd’ant a sunfriri prus(u)
e su Cristus(u) Gesùs(u) / nascit torra in custa Terra;
candu dònnia sonu ’e gherra / s’at a tramudai in mudesa
e is cristianus sa bellesa / in su coru ant a connosci;
candu s’òmini at a arrosci / de bivi po su dinai
e imparat a imprassai / is valoris prus sintzillus;
candu de su mundu is fillus / ponint fini a su certai
e ant a bolli caminai / in su surcu ‘e s’amistadi;
si at a binci s’onestadi / contras de sa prepotèntzia
e sa manu in sa cuscièntzia / dd’eus a ponni sena ‘e grisu;
si s’averat custu bisu, / si agataus custa crai,
dd’eus a podi apretziai / su sentidu de sa vida.
Càstia puru: No s’at imparau nudda sa Stòria.
(1) de Didatticarte.
