Màgini: Antonio Ballero, Sa brùscia, 1908 (1).
Ellus cussu mundu est spèrdiu, no nc’est prus. Mancai, chi nci poneus menti e s’arremengaus is mànigas, fait a ndi fraigai unu povintzas mellus!
Càstia puru: Bella e armoniosa, lìngua … sa mellus cosa.
Deu ddu sciu chi su sardu est morendi.
de Piero Marcialis (2).
1.
Deu ddu sciu chi su sardu est morendi,
ca in sa ruga no intendu anninnia,
duru duru no intendu contendi
che a su tempus de sa picinnia.
2.
Est morendi su sardu ddu sciu,
ddu cumprendint is mamas po mei,
giai diora ddu narat sa lei:
po su sardu su sardu est proibiu
3.
Est proibiu po su sardu, si nau,
de ripiti po isvagu e allirghia
bìchiri bìchiri bacu bau
est arribau su meimei.
Ddu ripitu, ddu narat sa lei,
est proibiu dònnia giogu e anninnia.
4.
Seus che piscis piscaus cun sa lua,
mi-nd’acatu in sa ruga passendi
candu intendu is pipius gioghendi
chi no itzèrriant(a) prus «mamacua!».
5.
Deu ddu sciu chi no biu piciocheddu
chi a su coru mi dongat prexeri
de ndi-dd’intendi s’antigu fueddu,
6.
deu ddu sciu chi no intendu prus mama
de ventana donendi s’avisu
«Beni a biri de babbu sa pisca»
«Imoi no, seu gioghendi a furrisca».
7.
Prus no biu disenniau cun su ghìsciu,
o craboni, a sinniali nieddu,
su retàngolu de su pincareddu,
in sa pratza in su logu prus lìsciu.
8.
No biu prus is pipius a giogai
sa bardùfula, a boxis de macu:
«Poni a ròlliu, dda segu, dda spacu,
dda pitzolu, dda fatzu bolai».
9.
«No arretzetat bardùfula mia»,
sèria sèria girendi. Est un’amàchiu.
Sa prus bella pintada boliat,
fiat de nuxi, de ispagu s’acàpiu.
10.
Prus no intendu in sa pratza is matucus
tzerriendi e faendi muntoni:
«Beni a innoi, chi faeus tzach’e poni,
però a pagu, no faeis is basucus».
11.
S’est sturada sa boxi ‘e is pipius,
est giai meda si sciint(i) cumprendi
su chi nant(a) fueddendi is tzius.
Deu ddu sciu chi su sardu est morendi.
(1) Distretto Culturale del Nuorese.
(2) La poesia satirica in Sardegna, a incuru de Franco Carlini, Edizioni della Torre, pgg. 117-119.
