Custa lìtera, che is chi ant a sighiri, est sa torrada de su Diretori de unu giorronali (no de custu chi seis ligendi) a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri de fai una torrada unu pagheddu irònica e brullana…
ARRESPUSTA DE SU DIRETORI
A sa presidenti de sa Regioni Sarda – chistioni: speculatzioni energètica
de Giampaolo Pisu
Vossinnioria sa Presidenti stimada.
Mi onorat meda su fatu chi apat torrau a scriri a mei ùmili diretori de giorronali. Imoi ca sa “campànnia eletorali” est acabbada e s’agatat in mesu de is peis cust’àtera chistioni manna de s’afracada mala de is multinatzionalis de s’energia: crobus chi bolint ponni is farrancas insoru in domu nosta impriastendi-ndi terra, mari e celu cun pannellus fotovoltàicus e pàlias eòlicas. Custa est cosa chi diaveras no benit a beni! Fostei m’arregordat ca una lei “MARIGOSA” de su Stadu no scéti ddu permitit, ma ddu bolit fortementi, AMAROLLA! Su guvernu Draghi (a unu fogu! Fatu a dragu!) etotu iat favorèssiu totu custu boghendi-ndi is trebeddas burocràticas po fai citiri is murrùngius de sa genti e de is comitaus; e is àterus partidus de guvernu anca stocada fiant?
Ma provau at a telefonai a sa Presidenti de su Consillu, mancai pedendi-ddi solidariedadi, arregordendi-ddi ca cun d-unu sangunau che su suu no podit chi essi de orìgini sarda! Mah! Chi dd’apat torrau de no ddi segai sa conca ca tenit giai de pensai a Salvini? “Lintu a fini a fini…” “Ma ddu bolint cumprendi custus sardus o no ca ddis serbit energia a stracu baratu po andai ainnantis! O ddus faeus sciacuai in àcua frida in s’ierru, bufai birra callenti in s’istadi e papai proceddu e pisci cruu che a is giaponesus?” (Nanca a issus ddis fut beniu po s’amarolla a imbentai su sushi ca no teniant ni gas e ni linna po arrustiri, mischineddus!)
Parrit chi apat incarrerau custu omineddu chi biviat acanta de mari, po s’abbisòngiu su pisci si-ddu papàt cruu. Su Scimpru dd’iat annomingiau sa genti arriendisi-ndi, agoa dd’iant incurtzau su nòmini a Su Shi/Sushi). Vossinnioria mi cunfirmat ca sa produtzioni de custa energia at a serbiri po una populatzioni de unus binti millionis! Chi siat fatu pensendi a unu “crescimentu demogràficu” chi iat a podi echilibrai su pesu de sa Sardìnnia cun sa Sitzìlia in is eletzionis europeas?
Perdonit ma nosu custu no ddu credeus! E de totu custa energia prodùsia ita stocada si-ndi faeus? Comenti? Ge no eus a bolli chi ddu fatzant po de badas custu tiàmini de Tyrrhenian Link? Ma assumancu sa currenti ge dd’eus a pagai prus barata! Ita? Dd’eus a pagai fintzas prus cara ca su costu de custus impiantus ddus pagaus nosu etou? Ma macus seus!? Torra corrudus e apaliaus!? Ma cancarau est custu guvernu de cambiai sa lei? Mancai donendi a is Regionis is cumpetèntzias? Ge no at a essi ca calisisiat guvernu nci siat, a guvernai diaveras funt sèmpiri is pròpius poderis econòmicus fortis chi a scusi movint is filus? Pistaus a terra e pigaus a trogus de pilus!
Energeticamenti suu
Su Diretori
