Un’àtera paristòria de Gaius Julius Phaedrus, pigada de Phaedri Augusti liberti Fabulae Aesopiae.
Càstia puru:
Su Cruculeu e su Lèpuri
Su Lupu, su Margiani e sa Martinica giugi insoru
Su burricu e su lioni cassadoris
Lìburu I – Paristòria XI
Bagian’ ‘e glòria, sena de virtudi
su stràngiu trampat, befau est de connotu.
Cassai boliat a molenti su lioni
crobetu a tupa, impari at cumandau
a boxi allena is feras de atzicai
po si cassai a solu is fuidoris.
Tzèrriu cun fortza bogat s’origudu
e a spantu nou is bèstias avolotat
spramadas bellu giassu giai circhendi
lioni afracat, si-ndi fait matantza.
Stasiu de stragu, tzèriat su burricu
mudori ddi cumandat. Su scundiu
“Bella m’intendis boxi, oh su lioni?”
“De spantu” narat “mai chi emu connotu
s’ànimu cun s’erèntzia cosa tua
a sprama uguali certu emu fuiu”.
Su chi, sena de balli nudda, fait su bagianu contendi de is impresas suas, podit trampai a is chi no sciint e chini est, ma est befau de is chi ddu connoscint.
Su lioni boliat andai a cassa cun su burricheddu, dd’iat crobetu a tupa e impari dd’iat cumandau de atzicai is bèstias cun sa boxi cosa sua chi issas no connosciant; issu ddas iat a essi cucadas fuendi-si-ndi. Intzandus cussu a origas longas de suncunas ndi bogat a totu fortza unu corròxinu e diaici avolotat totu is arresis. In s’interis ca issus spantaus circant unu giassu po si-ndi fuiri de su padenti, su lioni ddas afracat e si-ndi fait matantza. Custu, stasiu de su stragu, tzèrriat su molenti e ddi cumandat de abarrai citiu. Intzandus issu presumiu: “T’est pràxïu comenti apu traballau cun sa boxi cosa mia?” “Stravanada” ddi torrat “chi no ti connoscemu su naturali e s’arratza, mi-ndi femu fuiu spramau deu puru”.
Innoi fait a ligi is scritus, originali e italianu.
Innoi fait a ddu ligi in inglesu puru.
