Sa de tres partis de “Is gatus de Ulthar” – (innoi fait a ligi sa primu)
Tradusidura de unu contixeddu de H. P. Lovecraft.
Duncas sa bidda de Ulthar si-nci fiat dormia arrennegada, chena de fai nudda; e candu sa genti si-ndi fiat scidada a arbescidòrgiu – alloddu! Dònnia gatu fiat torrada a domu sua! Manna e pitica, niedda, a colori de cinixu, pertiatza, groga e bianca, no nd’amancàt una. Is gatus pariant bellas grassas, e sonànt surruschiendi totu prexadas. Is tzitadinus iant chistonau de s’acuntèssiu e si fiant spantaus meda prus che no pagu. Kranon su bèciu iat torrau a insisti ca fiat sa genti nieddutza chi ddus iat pigaus, stau ca is gatus no torrànt mai bius de sa domu de su bèciu e de sa mulleri. Ma totus fiant deacòrdiu de una cosa: ca su fatu ca is gatus no boliant ni papai sa petza chi ddis donànt ni bufai lati de su pratìlliu fiat cosa tropu crosidadosa. E po duas diis interas is gatus bellus e mandronis de sa bidda de Ulthar no iant tocau cosa de papai ma iant dormiu sceti o acanta de su fogu o in su soli.
Nci fiat passada una cida intera innantis chi is biddajus si-ndi fiant acataus ca a scurigadòrgiu no ddoi iat luxi alluta in sa domu asuta de is matas. Infatu, su notaju làngiu Nith iat nau ca nemus iat biu ni a su bèciu ni a sa mulleri de sa dii chi si-ndi fiant sparèssias is gatus. Sa cida apustis su sìndigu iat sceberau de si-ndi bogai sa timoria e, po doveri, de s’acostai a sa domu chi fiat silentziosa in d-una manera strana, ma si fiat assigurau de ingolli cun issu a Shang su ferreri e a Thul su picapedreri puru chi depiant fai de testimòngius. E candu iant sciusciau sa portixedda iant agatau custu sceti: in terra, ossus de òmini lìmpius chena de carri, e unus cantu baballotis strabecus caminendi in su scuriu in is furrungonis.
Apustis de custu, is printzipalis de Ulthar iant arraxonau meda. Zath, su dotori, iat chistionau meda cun Nith, su notaju; e a Kranon e a Shang e a Thul totus ddus iant prenaus de pregontas. Iant interrogau meda finsas a Atal, su pipieddu fillu de su stariàrgiu, e po prèmiu dd’iant donau unu durci. Iant chistionau de su massaju bèciu e de sa mulleri, de sa carovana de sa genti nieddutza, de Menes e de su pisitu nieddu, de sa pregadoria de Menes e de su celu candu fiat faendi cudda pregadoria, de su chi ant fatu is gatus sa noti chi si-ndi fiat andada sa carovana, e de su chi iant agatau infatu in sa domu asuta de is matas scuriosas in cussa pratza chi faiat a grisadura.
E a s’acabbu is printzipalis iant passau cussa lei stravanada chi ndi chistionant is mercaderis in Hatheg e nd’arraxonant is biaxadoris in Nir; est a nai ca in sa bidda de Ulthar no fait a bociri is gatus.
Màginis pigadas de Pixabay
