Su fàmini de s’annu doxi
In su 1802 Napoleoni Bonaparte nc’iat bogau is Savoia de Torinu e iat uniu su Piemonti a sa Frantza; s’urrei piemontesu si fiat dèpiu fuiri in Sardìnnia. In su 1812 s’urrei Vittorio Emanuele e su prìncipi Carlo Felice biviant in Casteddu, ma is sardus no fiant prexaus mancu po nudda ca issus, po sustenni su gastu smanau de sa corti, ddus baticollànt cun pagamentas fiscalis tropu mannas. Est a nai puru ca s’ighìtziu de su de XIX sèculus fiat malu meda po is carestias chi arribbànt un’annu avatu de s’àteru. In su 1811 s’ierru fiat stètiu fridu e su beranu iat portau sciutori e basca: iant incungiau pagu trigu, in su mentras sa pigota faiat mortallas apetotu. Candu in su 1812 fiat arribbada sa prus carestia mala chi s’òmini podiat arregordai, sa mindighèntzia de su pòpulu fiat bènnia aici manna de no dda podi poderai prus. Sa genti po papai andàt a su sartu po circai erba e Casteddu fiat prena de genti disisperada e famia chi, circhendi agiudu, fatuvatu si moriat in s’arruga. De innoi ndi bennit su dìciu, imperau oindii puru, chi arregordat “su fàmini de s’annu doxi”. In àtongiu de su pròpiu annu arregordaus s’avolotu chi ddi nant “sa furriada de Palabanda”, ma de custu nd’eus a chistionai.
