Màgini (cuadru XVII) pigada de Wikipedia e de sa “Sala de su burricu de oru” , in sa Rocca dei Rossi in San Secondo (Parma).
Càstia puru: Su burricu s’iat a depi amostai in pùblicu, 16.
Ma Lùciu, apustis de aici medas barrancus e benturas, no arrenescit prus a aguantai, puru ca torrat a tenni cuscièntzia de sei etotu, furriendi-sì a sa manera d’essi chi nci-dd’iat custrintu una mazina arrorosa. Si-ndi fuit a s’oru de mari. Disìgiat de dd’acabbai inguni e stasiu si-nci dromit. Che bisu, ndi-dd’aparessit sa dea Ìsidi chi, annuntziendi-nde-ddi chi luegus iat a essi torrau a essi òmini, ddu scidat e ddu cumbidat a sodigai su corteu de pòpulu e sacerdotus chi funt incarrerendi faci a su tèmpiu po is sacrifìcius de beranu chi est acanta de benni. Arribbau inguni, a s’acabbada at a agatai s’arremèdiu aici tanti disigiau, is arrosas: ddas at a papai, at a torrai a essi òmini (cuadru XVII), at a bessiri sacerdotu e missionàriu de Ìsidi e de is mistèrius cosa sua.
Lìburu XI, 12.
E alloddu arribendi su benefìtziu promìtiu in sorti de sa prus dea misericordiosa e alloddu su sacerdotu chi s’acostat portendi-mì sa salvesa e chi, cunforma a sa promissa divina, teniat in sa manu dereta su sistru de sa dea e po mei sa corona de arrosa, sa corona etotu dimòniu chi mi serbiat, ca apustis de totu su dannu chi mi-ndi fiat arribau e is perìculus chi emu incapitau, gràtzias a s’agiudu de sa grandu dea, emu a essi bintu cudda Sorti chi s’incaniat contras de mei a manera aici mala. Mancai pigau de unu prexu subitanu, no mi femu postu a curri a manera atropelliada, ca no bolemu avolotai, cun d-un’afracada arrepenti de bèstia a cuàturu peis, s’andai assèliu de sa tzirimònia religiosa; invècias, movendi-mì abellu abellu, cun cautela, a manera giai de òmini e caminendi unu pagu a sbiàsciu, mi-nci femu fichiu in mesu a s’arrufa chi, po ispiratzioni divina, si oberiat ananti miu.
Innoi fait a agatai fintzas su scritu originali e sa versioni in italianu:
Lùciu si-ndi fuit a s’oru de mari XVII
Acabbau
