Màgini: Erasmus of Rotterdam, Hans Holbein der Juengere, 1523 (1).
Qui trovi la versione in italiano.
You can find the English version here.
Erasmu de Rotterdam, s’òmini de sa modernidadi, de s’Europa, iat scritu “Moriae encomium” in su 1509, a s’inghitzu de sa simana moderna. Est sàtira de sa teologia scolàstica, de su cleru imorali e bantu de su machiori de su cristianu beru chi tenit fidi e stima po s’umanidadi.
Innoi una Cantzoni a curbas chi provat a ddi rendi onori. Sa Giuria de su Prèmiu Logudoro Otieri dd’at bòfia strinai cun su prèmiu Sardidade in sa Setzione “Salvatore Bertulu”, Poesia a tema lìberu (2).
Bàntidu de Machiori
Cantzoni a curbas
1.
Canteus grand’Erasmu, stimau po sabiori.
Intreu boliàt mundu, in totu amistadi.
Stesiai Fariseu, che genti de arrori
ca issu fiat omi cristiana ‘e pietadi.
2.
Cristiana ‘e pietadi teniat punna in vida,
ch’iat sempri passau sulenu in biaxi.
Simana ‘e scuriu fiat bell’ ‘e finida,
fiat tempu’ arribau pensai mundu in paxi.
Sa stampa a spraxi todescu a’ inghitzau,
Colombu at tentau nou mundu a scoberri,
Tolòmeu a ferri Polacu est acanta.
fun’ prus de noranta is de liberai.
3.
Is de liberai de malu maistru,
chi prexu no bolit, s’intendit virtuosu,
su prus sendi sàbiu. Su novu ministru
allò est su bovu, s’imparat su gosu,
de spàssiu est bramosu. Diosa est Machiori,
de vida mediori. Che bella cumèdia,
chi parit tragèdia, a candu s’atori
dispintat dolori, carota e’ a bogai.
4.
Carota e’ a bogai. Atesu scimpròriu,
de Fùria su fillu, de gherra su fertu
e dònnia delitu. Est malu sciollòriu
spramai su studianti, mancai su prus spertu.
Trobeddat su certu su malu abogau.
Urrei sperditziau, cun malu su predi,
de dexi arrechedi’ e puru su papa,
cun cuddus a capa, no funt a stimai.
5.
No funt a stimai. Bantau de Epicuru,
su bellu Machiori. Dd’iat nau Geremia
de s’òmini macu. Bessei de su scuru,
‘che locu chistionu’, est Pàulu sa bia.
De Cristu sa ghia ‘e, dotoris atesu
notzentis in mesu, su celu a promiti.
Chi Erasmu permiti’, allò cun ardori,
che scienti’ ‘e Machiori pretzisu est andai.

(1) MeisterDrucke.
(2) Allodda sa motivatzioni: Su sambenadu de su poeta, pro cantu istet in Sardìnnia e iscriat e faeddet in sardu, nos narat chi s’orìgine sua no devet esser de inoghe. Su Prèmiu Sardidade no li enit dadu pro s’argumentu tratadu, chi podet essere unu tema universale, ma pro s’ischema mètricu, sa Cantzoni a curba, una mètrica de su connotu de su Campidanu, una prenda difìtzile e cumplicàda a la manitzare, chi su poeta est resèssidu a fagher cun maestria e, in su mamentu etotu chi la proponet, l’est agiuende a nde l’ogare dae s’olvidu.
