Màgini: Cupidu e Psichi, Edward Burne Jones, 1865 (1).
Un’àteru primu prèmiu po Antoni Nàtziu Garau, custa borta in su Cuncursu literàriu de poesia e prosa “Salvatore Sini” de Sarule, cuncordau aintru de su “A Diosa Fest 2026”. Aici sa giuria: “sa calidadi literària, s’originalidadi de s’imbentu, s’atzivimentu de s’espressada, sa fungudesa de is versus, sa calidadi de sa lìngua, sa capatzidadi de ndi fai bessiri a pillu sentidus e arregordus, s’arrespetu de sa punna de su Cuncursu”.
Po no ndi studai sa spera
Arrepentina a sa dereta e arretrogada, sighida a sa dereta
Abogau Badori Sini / cuddu amori iat cantau,
Badori Sini abogau, / cun sa fèmina sennori,
Sini abogau Badori / fut poeta abistu e fini,
Badori abogau Sini, / de Cupidu fut profeta:
abistu e fini poeta, / de s’amori fut maistu,
fini e poeta abistu, / de su coru su pruini,
poeta abistu e fini, / ndi bogàt si fut pedrosu.
Sena de agatai reposu / e cun s’ànima in pena,
de agatai reposu sena, / s’amorosa po stimai,
reposu sena ‘e agatai, / po ddi ‘onai dònnia beni,
che Paridi cun Aleni, / rosa bella beneita.
Si oi dd’essit iscrita / “A Diosa” sua stimada,
no dd’iat a ai acunortada, / ca su pistighìngiu est mannu,
biendi totu su dannu / chi turmentat(a) sa Terra,
prena de tìrria e gherra / po mori de sa malesa
e de s’umana tontesa / chi at pèrdiu ‘ònnia valori.
Innui est(i) cuddu amori / chi animàt a s’abogau?
Cali steddu nd’iat furau, / si su celu est prenu ‘e dronis?
Funt is bombas e is cannonis / chi ddu guastant su reposu
e ndi liant dònnia gosu / a criaduras innotzentis
in totu is continentis / de acanta e de atesu.
Oh Poeta sarulesu, / forsis est sa mellus cosa
chi impari a Diosa / abarreis innui seis,
assumancus no bieis / de su mundu s’avolotu,
ma però, tenei a notu, / chi sigheus a dda cantai
“No mi potzu pausai”, / prena de amori e paxi,
po chi sulit un’araxi / e apoderit bia sa spera
de agatai sa manera / de isperdi dònnia tìrria!
(1) de Didatticarte.
