ARRESPUSTA DE SU DIRETORI
a JOHN BIDEN
de Pàulu Pisu
Vossinnioria su Presidenti-Ancora po Pagu! Mai m’ia a-p essi abetau de arriciri una lìtera de Fostei! Si biit ca su shock, su corpu po ai pèrdiu is eletzionis de Kamala Harris cun Trump dd’at fatu acabbai de perdi su sentidu… Ma pròpiu seguru seguru est chi boliat scriri a mei? O tot’axeliau coment’est at sballiau indiritzu? E comenti at fatu a mi scriri in sardu? Ita? A sa tradusidura nci at pensau unu disterrau (1) sardu chi bivit acanta de sa DOMU BIANCA? Furriau a cardanca dd’agatint! Ma chi in sardu no scriint mancu is guvernantis nostus! Ma Vossinnioria su Presidenti-Ancora po Pagu, ita si creit de essi su fillu de sa pudda bianca! O ia a depi nai su fillu de sa pudda de sa domu bianca! A dònnia modu, po torrai a sa chistioni de is eletzionis, mi scriit ca diaveras no podit cumprendi comenti est chi Kamala Harris at pèrdiu!
Trump at nau ca po issu est stètiu unu giogu! Eja, de cartas, ca no ddi nant Trump po de badas! (1) No si-dda pighit ma medas ant nau ca custa borta fut coment’e sceberai intre càntziru e arràbiu… Cali fiat su slogan cosa sua? “Prus bombas po totus” E poita iat a ai dèpiu binci Kamala? Sa gherra Rùssia-Ucraina iat a essi sighida a su pròpiu, e is americanus incapas ndi tenint s’ànima prena de cust’Amèrica chi bolit fai su scerifu de su mundu faendi arroris mannus anca passat; ant a ai pensau de bessiri totus arricus che Elon Musk? O at a essi ca Trump at nau ca nci bogat a sonu de corru, pardon, de trumba, totu is disterraus irregularis? Ge no at a essi ca a is eletoris ddis praxit a intendi tzerriendi e fueddendi mali? Chi Trump arrapresentit s’òmini forti che medas àterus presidentis de su mundu chi currint deretus a manu dereta, sa faci che una silieta! (3) … baixirca-ddi babbu a Deus!
A dònnia modu deu in pasa de Vossinnioria su Presidenti-Ancora po Pagu, innantis chi acabbit de si scibuddai, ia a scriri una bella lìtera longa longa a su Paba po ddi cunfessai totu is pecaus e ddi pediri perdonu! Ita? Custu dd’iat giai pensau ca no est po de badas chi at cuntzèdiu sa gràtzia a is cundennaus a morti! (4) Perdonu po perdonu? Mah… Assumancu po una cosa seu deacòrdiu cun Vossinnioria su Presidenti-Ancora po Pagu: “chi Deus si-ndi campit de su dannu chi at a podi fai su presidenti nou!” Mancai cun d-unu nòmini aici parrat totu giogu, spereus sceti chi po nexi de custu giogu su mundu no nci perdat lati e cardaxu!
Democraticamenti suu Su Diretori
1 emigrato
2 TRUMP bolit nai BRISCOLA (fintzas “tromba”: verbu o strumentu musicali? Detzidei bosàterus!)
3 vaso da notte
4 BIDEN de pagu at gratziau 37 cundennaus a morti
Custa lìtera, che is chi ant a sighiri, est sa torrada de su Diretori de unu giorronali (no de custu chi seis ligendi) a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori si pigat su stentu e de seguru su prexeri fai una torrada unu pagheddu irònica e brullana…
