Màgini: Francesco Hayez, Se bàsidu (primu versioni), 1859.
furriau in sardu de:
Ugo Dessy, Su tempus chi passat, Vol. IV, Contus e contixeddus, Alfa Edirice, 2002, pgg.152-153.
www.alfaeditrice.it/shop/collane/su-tempus-chi-passat
www.ugodessy.com
Po onori e gròria de Santa Crara – Primu parti
In d-una bidda no meda atesu de Terrùbia nci fiant una borta duus giòvunus. A issu ddi narànt Bissenti e a issa Pisabella. Si boliant beni unu mediori e si fiant fatus a sposus, sèmpiri atacaus apari. Ma luegu si fiant dèpius lassai, ca issu dd’iant tzerriau a fai su sordau in Continenti. Passau su tempus suu, Bissenti fiat torrau a domu. Ma issu no fiat cuntentu comenti iat a depi essi, ca in Continenti, una dii mala, si fiat fatu tentai de is amigus e fiat andau cun d-una de cussas fèminas malas chi dd’iat impestau. Su prexu mannu de Pisabella su podi imbratzai de nou su sposu suu e de ddu podi de nou carinniai! Ma issu tristu e afligiu, intimorigiau e bregungiosu no nci dda faiat a ddi nai sa beridadi a sa sposa sua – piciochedda ancora notzenti, sentza de malìtzia.
Antioga, sa mama de Pisabella, est beru chi fiat viuda, ma fiat puru una fèmina connoxidora, de cussas chi scint comenti si portant is santus a crèsia. Si dda fiat pensada, chi calincuna cosa mala depiat essi sutzèdia a su piciocheddu – chi issa ddi boliat beni comenti a unu fillu, e fortzis de prus puru. E aici, intradora, sprìcua sprìcua, iat finiu po si fai contai totu cantu su malifatu. In su primu momentu tzia Antioga si fiat lassada pigai de su scunfortu: “Ojamomia! It’arrori mannu chi s’est costau oi a nosu!” Ma fiat stada debilesa de pagu, poita luegu si fiat donada una scutullada, narendi: “Coràgiu, piciocu! Innoi toccat a s’invocai a Santa Crara sa Miraculosa de Terrùbia. Santa Crara custa gràtzia no mi dda depit negai!”.
Nau e fatu. S’incràs a chitzi, tzia Antioga s’incarrerat a crèsia e ingenugada ananti de sa Santa Miraculosa cumentzat a dda pregai chi Bissenti, su sposu de sa filla sua nodia, essit a su prus prestu torrau a bessiri sanau de cussa maladia. Si fiat invocada po chi dd’essit acantzau sa gràtzia, faendi votu chi totu de is tres iant a essi andaus a sa festa manna de Terrùbia po ddi portai una Missa e s’arregordu. E Santa Crara dd’iat ascurtada e si dd’iat fata, sa gràtzia; ca unu bellu mengianu Bissenti, scidendi-si-ndi totu alliputziu, si dd’iat stringhillonada e no ndi fiat scolau mancu unu stìddiu chi no fessit sùciu bonu. Su prexu de totu e is tres no faiat a ddu nai! Prus de totus tzia Antioga, chi luegu fiat curta a crèsia a ponni una candela manna alluta a sa Santa.
Sighit
