Màgini: Franciscan Gallery etsy.com
Unu contu de Vincenzo Ulargiu, pigau de “Messi d’oro del Campidano”, Sandron 1926
Editzioni eletrònica cunforma a s’originali cuncordada in su 2016 de Franciscu Capuzzi
Is cuàturu paras e su pisci
Cuàturu paras s’iant cotu a buddiu unu bellu pisci mannu. Fiant tres paras de missa e unu legu (1), chi s’ùrtimu faiat de coxineri. Portau su pisci a sa mesa, is tres paras de missa ddu dividint in tres portzionis: conca, taca de mesu e coa; unu a donniunu de issus tres, ca su para coxineri gei s’iat a ai cuntentau de su brodu. Iant decìdiu puru, aici po spàssiu, chi donniunu, po ndi pigai sa portzioni sua, depessit nai una màssima latina, adatada a cussa portzioni. Su para legu, de coxina, intendit totu e lassat fai; perou si ponit su didu in su nasu e narat tra issu “Si Deus bollit no s’eis a papai totu su pisci bosàterus”; e abarrat atentu, prontu a dònnia acidenti.
Comentzat padre Gaudèntziu, pighendi-ndi sa conca “Roma caput mundi”; sighit fra Basili cun sa taca de mesu “In medio virtus”; s’ùrtimu padre Felici, po sa coa “Finis coronat opus” (2). Ma no iant ancora acabbau, chi fra Nàssiu ndi bessit de coxina cun sa pingiada de su brodu buddiu in manus e “Asperges me hyssopo et mundabor!” (3) intonat, scemiendi brodu a sa spentimadura.
Boliast biri a is tres pòburus paras frusitendi e boliast biri a fra Nàssiu aferritendi! Ma si dd’iant meritau, mi parit, e ddu narat su dìciu puru “Agiuda-tì ca t’ap’a agiudai”.
(1) para legu: chi no at studiau e no narat missa,
(2) s’acabbada cumprit sa faina,
(3) m’as a scongiuai cun su tumbu e apu a essi mundau.
