Màgini: Hugh Thomson, meisterdrucke.it.
Sighit de: Su teatru de Oscar Wilde, Salomè.
Su teatru de Oscar Wilde.
In su bellu lìburu de su 2023, pubblicau de Alfa Editrice, Stèvini Cherchi at furriau in sardu campidanesu fintzas sa cumèdia:
S’importu de essi onorau.
Paraus s’arrogheddu afatanti, pigau de sa pg. 57, aundi Lady Bracknell si chèsciat de unu certu Bumbury:
“AGÈNNURI. Sciadau s’ iat a nai: est malàdiu de no crei.
LADY BRACKNELL. Depu nai, Agènnuri, ca creu chi siat tempus chi custu Bumbury si detzidat chi depit bivi o depit morri. Custu stòntona-stòntona de sa chistioni depit acabbai. E mancu potzu essi de acòrdiu in peruna manera cun custa simpatia de oindii po is malàdius. Creu chi siat una cosa morbosa. Is maladias, de calisisiat arratza siant, no funt cosas de incoragiri. Sa saludi est su primu doveri de sa vida. Si-ddu nau sèmpiri a tziu tuu, ma mi parit chi no ndi tèngiat coidu… assumancu a biri comenti est aciachientu. Ia a agradessi meda chi as a bolli pediri de parti mia a cussu Bumbury de essi aici bonu de no s’impeorai sàbudu chi benit, ca contu asuba tuu po apariciai su cuntzertu miu. Est s’ùrtimu chi fatzu, e serbit calincuna cosa po incarrerai is chistionis, pruschetotu a càbudu de stasoni candu donniunu at nau totu su chi teniat de nai, chi, giai sèmpiri, no fiat meda etotu.
AGÈNNURI. Ap’a chistionai a Bumbury, tzia Austa, chi est in sentidu tambeni, e pensu de ti podi impromiti ca sàbudu at a stai beni. Cumprendu ca is cuntzertus funt una cosa difìtzili. Càstia, chi unu sonat mùsica bona, nemus ascurtat, chi unu sonat mùsica lègia, nemus chistionat. Ma apu a torrai a castiai su programa chi apu apariciau, chi as a tenni sa bonesa de mi sighiri unu momentu in s’àteru aposentu.
LADY BRACKNELL. Gràtzias, Agènnuri. Ses prenu de coidu diaderus. (Pesendi-si-ndi e sighendi a Agènnuri) Seu segura ca su programa at a essi una bellesa, apustis de una pariga de sprugaduras. Cantzonis frantzesas no ndi podeus lassai. Sa genti pensat sèmpiri chi siant una bregùngia, e insandus o parint scandulaus, chi est una bassineria, o arriint, chi est peus puru. Intamis su tedescu sonat che lìngua de arrespetu etotu e deu ddu creu diaderus. Guendolina, acumpangia-mì.”
