Sant’Efis Poderosu, Vol. I.
Unu bellu lìburu su de Giuanni Spano, pintau a manera stravanada de Leo Pes, chi si contat de Sant’Efis e de is mistèrius de sa prufessoni, candu de Casteddu incarrerat po sciolli su votu de su 1656 po essi liberau sa citadi de sa pesta.
Dd’ant a presentai sàbudu, su 9 de maju, ai is 8.00 de a merii, in sa pratza de sa crèsia de Sant’Efis, in Stampaxi. Aproillai, ca custa no fait a dda perdi!
Ndi parau s’arrogu afatanti.
S’Arcicunfradìa de sa Bandera
S’Arcicunfradia est unu de is prus assòtzius de fidelis antigus de Sardìnnia. Sa faina sua est de assoddiri e fai traballai imparis totu is Cunfradias intituladas a Sant’Efis, cundrexi sa crèsia de Stampaxi intitulada a su Santu e apariciai totu is funtzionis in onori suu, de gennàrgiu finsas a dònniasantu.
A is chi faint parti de s’Arcicunfradia ddi nant cunfradis e germanas e funt is custodis e is spainadoris de sa devotzioni po Sant’Efis.
S’Arcicunfradia est stètia fundada in su 1538 de Paba Paulu III. Is chi dda ghiant funt su Presidenti, su Scusorgeri e su Segretàriu. A totu e tres imparis ddi nant “Sa Banca”.
Me is diis de sa festa, perou, su chi tenit sa responsabilidadi de totu est su Tertzu Guardianu: issu cundrexit sa stàtua de Sant’Efis e portat finsas su ghioni arrùbiu de s’Arcicunfradia. Su Tertzu Guardianu ddu sceherant su 19 de martzu, sa dii de sa festa de Santu Giusepi, e si stentat in càrriga po un’annu. Su 25 abrili de s’annu afatanti ddi tocat a lassai su ghioni a su Tertzu Guardianu intranti. In is tempus passaus, de s’Arcicunfradia de sa Bandera podiat fai parti sceti genti de su bixinau de Stampaxi, s’eredeu stampaxinu. Oindii s’Arcicunfradia tenit 150 sòtzius, òminis e fèminas, e ndi podit pigai parti finsas genti chi no est de Stampaxi.
Sa ghia spirituali de s’Arcicunfradia est su Capellanu, est a nai su canònigu chi tenit cura de is funtzionis, de is atòbius de preghiera e de sa catechesi.
Aìnturu de s’annu agiudat sa Cunfradia a abarrai in su surcu de sa faina sua e acudit a sa genti malàdia, abisitendi-dda e portendi-ddi sa Comunioni.
In is diis de sa festa is cunfradis e is germanas portant sa bestimenta penitentziali: is òminis portant unu saju asulu e una mantelledda bianca cun sa gruxi de sa Cunfradia, chi est bianca e arrùbia cun su fundu a colori de celu. Su biancu est po sa nidesa de sa Madonna, s’arrùbiu est po sa Passioni de Cristu e su colori de celu po sa regalidadi de Cristu.
pigau de: Giuanni Spano: Sant’Efis Poderosu, Vol I, Pinturas de Leo Pes, pg. 17. Alfa Editrice.
