Màgini: Maistru Venceslao, Mesi die gennàrgiu, Casteddu de su Bonuconsillu, faci a su 1400
furriau in sardu de:
Ugo Dessy, Su tempus chi passat, Vol. I, S’annu de su messaju, Alfa Edirice, 1989, pgg. 41-42.
www.alfaeditrice.it/shop/collane/su-tempus-chi-passat
www.ugodessy.com
Gennàrgiu
Is primus doxi diis de custu mesi nosi contant de comenti at a essi totu s’annu, allobendi dònnia dii a dònnia mesi: primu dii, gennàrgiu; segundu dii, friàrgiu; sa de tres diis, martzu e aici sighendi.
Arribant is diis sicus, unu tantixeddu de tempus a celu lìmpiu e asciutu, cun d-un’araxixedda de tramuntana. Su mari, pruschetotu in is primus oras de mengianu, est lisu che ollu. Est tempus de arritzonis chi, apustis sa luna de Paschixedda, funt prenus de is ous insoru arrùbius, a bisura de steddu.
Finas chi su tempus abarrat lìmpiu e sicu e su mari firmu, is arritzonis permitint a is prus messàjus giòvunus e abbillus de si guadangiai una dii arrica. Chi proit, si podit sèmpiri andai a circai sitzigorru o cardolinu.
Nd’ant giai bogau de sa bìngia is arrampus de sa primu pudadura – cussus sarmentus chi acapiaus in fascinas, impari cun sa modditzi, callentant su forru e sa coxina. Imoi sa bìngia est tempus de dd’arai, de nci semenai is leguminosas po azotai sa terra, de arrisigai sa cotzina po ndi-ddi torrai su scroxu nou e lisu, po chi no si-nci anniint tzerpius e parassitas.
Atentzioni manna tocat a donai puru a is matixeddas de frutu chi sèmpiri arricant sa bìngia: sa figu, chi si-nd’agatant genias diferentis in is cuàturus arrenconis o arrigheradas oru oru su mori (longa, matiniedda, perdingiana e rapellina), su piricocu, su prèssiu, sa pruna, infertus in sa mata de mìndula ca pesant allestru fortis e sanus. Est tempus de pudai e de arrodiai is mattas, faendi-ddas a arroda, sderriendi po chi totu is nais pighint soli e àiri.
Est abarrau ancora calincunu arrogheddu de terra, cosa de pagu contu, e est bènnia s’ora de dd’imperai. Semenaus a cìxiri e a gentilla ant a donai su lori chi est su primu mandiari in su mentras de s’ierru.
Gennàrgiu sicu, messaju arricu; gennàrgiu sciustu, messaju arrutu – Dìciu campidanesu.
De inoghe a bennartzu, ne antzone, ne arzu; dae bennarzu in cudda bia, fritu, fàmine et carestia (De innoi a gennàrgu ni angioni, ni infertura; de gennàrgiu in cudda bia, frius, fàmini e carestia) – Dìciu logudoresu.
Bessidu nde ses bennarzu / chi m’aias minatadu / chi mi dias aere dadu / Sa morte a sa gama/ A sa primu nie / Non timu pius a tie / Ca como timo a frearzu. (Acabbau ndi ses gennàrgiu / Chi m’iast ameletzau / Chi m’iast a essi bociu su tallu / A su primu nii / No timu prus a tui / Ca imoi timu a friàrgiu). Imbalapipiu logudoresu.
Friàrgiu narat: “Bessidu nd’est bennarzu / ne antzone ne arzu / ne arzu, ne antzone / manc’unu topigone (Acabbau ses gennàrgiu / ni angioni, ni infertura / ni infertura, ni angioni / mancu unu tzopu”).
Ndi-ddi torrat gennàrgiu: “Presta-mi duas dies / chi ti-las ap’a torrare / cando mi-nde as a bennere innanti!” (Impresta-mì duas diis / chi ti-ddas apu a torrai candu mi-nd’as a benni innantis). Custu est un’imbalapipiu logudoresu, chi is pastoris si-ddu nant s’ùrtimu dii de gennàrgiu.
