A sa presidenti de sa Regioni Sarda – chistioni: speculatzioni energètica 4
de Giampaolo Pisu
Vossinnioria sa Presidenti stimada. Ddi torru gràtzias primu de totu po m’ai prenotau po cudda ecografia a sa brenti chi dd’ia pediu cun s’àtera lìtera: fia gia abetendi prus de otu mesis! S’incras etotu m’ant tzerriau! Depu nai ca dònnia borta chi aberru sa posta eletrònica timu de agatai una lìtera cosa sua. No bollu nai ca dd’apu arròscia de Dd’intendi, custu no m’ia a permiti mancu a ddu pensai! Mi narat ca no arrennescit prus a dormiri po mori de sa chistioni de sa speculatzioni energètica (o SPEINCULATZIONI ENERGÈTICA comenti narat calincuna lìngua mala, ma chi Ddi parrint fueddus de nai!). Naca ddi torrant in sonnus, oi unu arrapresentanti de unu comitau e, noti infatu, su de un’àteru, chi ddi ghetant in faci, tzerriendi airaus, ca no est faendi nudda po difendi sa Sardìnnia! E totu is àteras cosas chi Fostei mi cunfessat: “Custus comitaus sèmpiri murighendi e afateriendi, ma no ndi tenint àtera cosa de fai? Po no fueddai de cust’UNIONI SARDA chi scriit dònnia dii! Una congiura! Ma no iat a podi fai che totu is àterus giorronalis e telegiorronalis, siat sardus che continentalis, chi faint finta de nudda e fueddant de sagras, de Meloni, de istadi, filmis, gherras… E cust’àtera proposta de lei Pratobello ’24: e scéti custa nci amancàt! Totus a firmai a firmai! Ancu ddis pighit a cag… ‘Ta dannu! Nosu una lei, mancai no serbat a nudda, dd’eus giai fata, e meda de cosa! Ca no ndi teneus de àtera cosa de fai!” E custas “aree idonee-decretu Fra’ Tin?” parrit una brulla de para! ‘Ta segamentu! Is comitaus nant ca innoi “aree idonee” no nci nd’at! Ca no ndi teneus! De su strupiau a su strupiadeddu… Arratza de collaboratzioni cun su Stadu italianu chi si pagat is pensionis!” Bellu sentidu patriòticu! E pensai ca nd’iaus a podi scabbulli s’Itàlia de totu custu CO2! Erois de Itàlia podiaus essi! Is primus! Fintzas prus de is erois chi iant donau sa vida po sa Pàtria in sa Gherra Manna de su 15/18!”
Perdonit chi mi permitu de ddi nai ca mi parrit ca Vossinnioria siat sèmpiri prus nervosa e spassientziada… Ddi potzu scéti consillai una pariga de diis de fèrias, mancai cun totu sa genti sarda in giru arrennegada cun Fostei, in pasa sua deu ddas ia a passai foras de Sardìnnia, e cun totu is disterraus sardus in continenti, incapas foras de s’Itàlia puru.
Sèmpiri energeticamenti suu
Su Diretori
