Màgini: Antonio Ligabue e sa mariposa bianca, 1940.
Una bella arrepentina de Giampaolo Nuscis chi iat giai pigau su primu prèmiu in sa de XVII editzionis de su concursu “Benvenuto Lobina”, Setzioni a tema lìberu – Biddanoa ‘e Tulu, làmpadas 2024 e chi imoi at pigau su segundu ex aequo in Tèmpiu , “Premiu di Poesia Salda Don Baignu”, sa de IV editzionis
BIVI IN SCORAMENTU
Dedicau a un’amigu chi sunfrit de strubus de sa menti
(“cuartu froriu”)
Nara-mì comenti bivis, – ita fais, it’atrivis
in s’inserru presoneri: – t’incaras beri-beri,
pagu bideas craras, – beri-beri t’incaras
tentu mesu in cuerru. – Presoneri in s’inserru,
seguràntzia no ndi zais, – it’atrivis, ita fais,
lughi parit de no ndi bì(ri), – comenti bivis nara-mì.
De s intrànnia su pispinzu – mudas in pistighinzu
e ziras in trumentus – pàsidus pentzamentus.
Mai carìnnius, bàsidus, – pentzamentus pàsidus
ndi litzis e arretiras – e in trumentus ziras.
Paghi, cama arrefudas, – in pistighinzu mudas
is trumuzous de lànnia, – su pispinzu de s’intrànnia
mai ti lassat in assèbiu. – Su andai lèbiu-lèbiu
si càrrigat d’amargura, – e ponit inchillidura,
ànimu mau disponit – e inchillidura ponit.
Pesu grai chi isàrrigat, – d’amargura si càrrigat…
Funis de no apoderai. – Su lèbiu-lèbiu andai
aintru etotu ti cassat, – mai in assèbiu ti lassat.
Mali mi nd’est pàssiu, tui, in gàbbia custoiu,
espressadas bellas no ndi podis prus cantai:
su càntidu de crucutzu, incarau in su niu
in cantilena de istria as dèpiu tramudai.
De candu innantis, in artu, su bòlidu bidiu
oi finas is abas t’ant costrintu a sabai…
Totu passu-passu in furrungoni sighiu,
cun dosi mesurada, po t’aprachidai
scoramentu, disacatu, invanu disafiu,
mali de sa vida, anneu lezu, penai.
M’at postu in tristura s’ora chi t’apu biu
pentzendi ca su de prima prus no torras mai.
