GEORGE ORWELL
1984
CAPÌTULU 1 – parti 2
Behind Winston’s back the voice from the telescreen was still babbling away about pig-iron and the overfulfilment of the Ninth Three-Year Plan.
Apalas de Winston sa boxi de su teleschermu fut ancora strecueddendi calincuna cosa avatu de sa produtzioni de sa ghisa e s’acabbu de su de Noi Pianus Triennalis. Su teleschermu arriciat e trasmitiat paris. Calisisiat sonu chi Winston iat a ai fatu prus a forti de unu mùsciu, ndi-ddu iat a ai pinnicau; in prus, po totu su tempus chi abarràt aìnturu de su campu de bisioni chi custa placa de metallu cumandàt, ddu iant a ai pòtziu siat biri che ascurtai.
Est craru ca no ddoi fut peruna manera de sciri si in cussu momentu pretzisu fiant castiendi-tì o no. Cantu bortas o cun cali printzìpiu sa psicopolitzia interferiat me is cavus chi bosi pertocànt, fiat scéti una chistioni de cungituras.
E si podiat fintzas pensai chi castiànt a totus e de sighida. A dònnia modu ti podiant cassai in su cavu cosa tua dònnia borta chi boliant. Depiast bivi (o po ddu nai mellus, si biviat po abbitùdini, chi fut oramai bessida, infinis, un’istintu) sciendi ca dònnia sonu chi faiast ddu iant a ai ascurtau, e a parti candu fiast in su scuriu, iant a ai biu dònnia mòvida.
Ddoi fiant sèmpiri custas scenas de domus de s’otuxentus totu sciorrocadas, cun is murus acotzaus cun punteddus de linna, cun is fentanas aconciadas a cartòcia e is coberturas de ferru totu a undas, e cussas cungiaduras de linna totu trotas e scoscimingiadas de is giardinus? E is logus anca fiant arrutas is bombas, anca su prùini furriotàt in s’ària e s’erba mala cresciat me is muntonis de cardàngiu; e is logus anca is bombas iant puliu unu tretu prus mannu e ndi fiant stupadas totu cussas barracas de linna caddotzas che domus de puddas? Ma totu po de badas, no arrennesciat a arregordai nudda: no fut abarrau nudda de candu fut piciocheddu foras de una carrera de cuadrus luxosus sèmpiri chena de sfundu e chi po su prus no si-ndi cumprendiat nudda.
Su Ministèriu de sa Beridadi, MiniBeridadi in neolìngua [Sa neolìngua fut sa lìngua ofitziali de Oceània] – fut diferenti meda de dònnia àtera cosa chi si biiat. Fut una strutura a piràmidi manna manna fata cun ciumentu biancu luxenti, chi si-ndi strantargiàt unu pianu avatu de s’àteru po 300 metrus. De anca fut Winston si podiant ligi, identificadas in sa faciada bianca a caràteris gallosus, is tres slogans de su Partidu:
SA GHERRA EST PAXI
SA LIBERTADI EST SCRAVIDADI
S’INNIORÀNTZIA EST FORTZA
