A s’amigu Antoneddu Garau no fait a ddu cumbati…e torra est bessiu primu in su “Prèmiu Otieri de Literadura Sarda” , setzioni “Tra poesia e càntigu – Antoni Cubeddu”. Allodda sa motivatzioni:
“S’òpera ‘Sa boxi muda de s’arrennegu’ de Antoni Nàtziu Garau tenet su preju de aunire sa tradissione antiga de su cantu cun sos tempos de oe, a dolu mannu pro su chi pertocat sos argumentos cantados: sa forma mètrica de s’arrepentina a sa dereta, impreada cun rigore, est posta a serbìssiu de una denùntzia tzivile fata a boghe isparta. S’andanta cadentzada de sos versos acumpanzat eventos tràgicos, iscutinande sa sensibilidade de su leghidore, leande memòria istòrica e de s’edade presente: ammentende s’Olocàustu a un’ala e sa tragèdia palestinesa a s’àtera, ambasduas cantadas che inzustìssias chena zustificassione peruna. Nde resultat un’òpera chi jughet sa fortza de faeddare a su pùbricu de eris e de oe”.
SA BOXI MUDA DE S’ARRENNEGU
Arrepentina a sa dereta
No s’ant imparau nudda / is bregùngias de sa Stòria,
no s’abarrat sa memòria / de totu is fainas malas:
che pillonis sena ‘e alas, / ddas biveus cun infadu,
abetendi chi su fadu / fatzat s’òmini prus sàbiu.
Is Ebreus, malagràbiu! / ant connotu su turmentu,
campus de cuncentramentu / chi at fatu su nazismu,
cun s’agiudu ‘e su fascismu / aprontada dd’ant sa pratza:
su scimprori de s’arratza / a millionis nd’at mortu!
Cali mali, cali tortu / teniant cussas criaduras?
A muntoni in sepolturas / agatànt(a) su reposu
de una vida sena ‘e gosu, / de una vida de tristuras,
de una vida ‘e travessuras, / de una vida disdiciada.
Oi sa cosa est mudada / e furriada est a s’imbressi:
ma comenti podit essi / chi de Palestina in terra
siat mòvia mala gherra / contras fèminas, pipius,
cun aciocus atrivius / a sa genti innotzenti,
fatus apostadamenti, / orrorosus e faddius?
Abarraus atrudius: / sena ’e àcua, sena ‘e pani,
chi nimancu a unu cani / ddi merescit cussa sorti,
is lentzolus de sa morti / cun criaduras imboddiadas,
cun is facis sbisuriadas / e is mamas atitendi,
chi no podint(i) cumprendi / cuddas bombas de Israeli.
E, cun totu custu feli / chi ingendrat ‘ònnia mali,
sa cuscièntzia otzidentali / a sa muda, castiendi!
Ita tempus seus bivendi, / a innui boleus andai,
si mancu scieus pesai / una boxi de arrennegu?
Màgini de ChatGPT.
