màgini pigada de pixabay
di Lorenzo Argiolas
su 5 de làmpadas 2020
Custu coronavirus (chi parit sa musca macedda chi sa Sardìnnia at giai connotu in tempus passau) est fadendi-sì torrai a pensai a totu. Tocat a torrai a pensai a sa sotziedadi, a su benidori econòmicu e povintzas a sa pòlitica. Po imoi medas funt is cambiamentus chi depeus aprontai po sighiri a bivi cun seguresa, chentza de problemas po sa saludi.
Est duncas una chistioni de importu mannu, e de atualidadi, po s’economia de sa Sardìnnia, cussa de su turismu. Dònnia annu unu muntoni de turistas benint a bisitai is bellesas de s’ìsula. In custu tempus, perou, at a essi difìtzili meda chi is cosas torrint comenti fiant. Est custa un’ocasioni po arrexonai de unu modellu turìsticu diferenti. Oi genti meda est abbituada a pensai a sa Sardìnnia feti po su mari, po is prajas, po sa Costa Smeralda, cun totu is comodidadis. Ma nc’est un’àtera Sardìnnia, diversa, chi in medas no connoscint. Una Sardìnnia bella a su pròpriu, est sa Sardìnnia de is biddas, de is murales, de s’archeologia nuraxesa, de is minieras e de medas àteras bellesas.
Ma poita est chi depeus promovi unu turismu diversu? Poita tocat a castiai is cosas in manera diferenti, circhendi de essi prus responsàbilis e arredusi is dannus a s’ambienti. Ma tocat puru a mantenni s’identidadi de su pòpulu e de su logu nostu. Tocat, duncas, chi sa pòlitica, ma pruschetotu is polìticus siant prus atentus a avalorai su logu, sa cultura, is traditzionis, sa lìngua, s’arti e is mestieris de Sardìnnia. Nci bolit unu trabballu mannu, chi partat de is scolas, poita is prus de is bortas seus nosu sardus etotu a no connosci sa stòria nosta, a no chistionai su sardu e a no sciri abi biveus. Una terra, sa nosta, chi tenit unu potentziali mannu, una terra chi podit essi protagonista in Europa e in su Mediterràneu.
Insaras circheus de fai funtzionai su ciorbeddu po ndi bogai aforas bideas po torrai a partiri. No est andau totu beni cumenti s’ant nau a s’inghitzu de custu lockdown (at a essi mellus a ddu tzerriai acorru?), ma nosu seus genti forti, chi si-ndi sciit torrai a pesai e podit essi puru chi ndi bessat a pillu una cuscièntzia prus manna de ita boleus essi coment’e pòpulu. Poita tocat a no si-ndi scaresci de is arrèxinis, ma sèmpiri andendi ainnantis.
