Màgini de ChatGPT
Qui trovi la traduzione in italiano.
Here you will find the English translation.
A incuru de Maria Farranca.
Chini iat scritu Sa scomùniga? S’autori abarrat disconnotu, mancai fiat unu predi, bai e circa. Est poema de genia aresti, a versu lìberu, scritu prus o mancu in sa metadi de s’otucentus; su metru est acanta a su de s’arrepentina. De issu Antonello Satta scriit in su segundu pròlogu (1): “No cretais, mancai bosi-ddu nerit genti de lìtera, chi Sa scomùniga de Predi Antiogu siat sceti una brulla, una cositedda de pagu brofetu, bona po ndi podi passai un’ora in disaogu. Chini bosi narat aici, chi no est tontu, est mali cunsillau o est abarrau stronau de cudda cultura italiana chi no bolit lassai funi longa a sa cultura sarda. Sa scomùniga de Predi Antiogu, chinisiollat chi dd’apat cumposta, tetit mèritu de poesia e si podit ponni a paragoni cun àteras poesias furisteras chi ant tentu o tenint ancora oindii grandu fama”.
Ndi paraus innoi is primus versus, àterus ant a sighiri.
Sa scomùniga de Predi Antiogu arretori de Masuddas.
S’amonestu. Predi Antiogu stratallat su pòpulu de sa trona de sa crèsia. Arregordat ca ndi-dd’ant liau is bèstias e narat ca nisciunus podit dispintai de no ddu sciri.
Pòpulu de Masuddas,
chi a s’ora de acujai
is cabonis e is puddas
basseis a scrucullai,
donai-mì atentzioni (5)
po totu su chi si nau,
si ap’a tenni arrexoni
de cicai is crabas mias,
ca funt(i) giai dua’ bias
chi dd’apu fatu notòriu (10)
e custu at a essi su tretzu
e ùrtimu monitòriu.
Po chi nisciunu però
no potzat allegai
ni chi sì ni chi no, (15)
avrincus de ignoràntzia
ddu torraus a manastai
sagundu sa costumàntzia
po òdrini de Muntzannori.
Sighit: Po cuddus chi no ddu sciint(i)…
Mitzas:
(1) I grandi poeti in lingua sarda. SA SCOMUNIGA…Edizione critica con introduzione e glossario a cura di Antonello Satta, pg. 49-50.
horoene.wordpress.com/2017/04/12/sa-scomuniga-de-predi-antiogu/
https://lyricstranslate.com/en/sa-scomuniga-de-predi-antiogu-excommunication-priest-antiochus.html
https://www.poesias.it/poeti/anonimi/scomuniga/sa_scomunica_e_s_arretori_de_masudhas.html
https://www.ilmessaggerosardo.it/index.php?option=com_content&view=article&id=4819:su-mundhu-de-sa-poesia-de-cristoforo-puddu-%E2%80%93-abrile-2023&Itemid=171
