Màgini pigada de Sardegna Turismo
de Giacomo Costantino Porcu
su 17 de làmpadas 2020
Praja de Pistis
Ap’a ai tentu ses o set’annus. Stèrrius in s’areni de Pistis cun babbu e mama fiaus. Su bentu chi moviat is pilus infriscàt e arrechediat su pàsiu. S’àiri càrriga de sali de mari me in sa peddi abarràt arrèscïa e dda fadiat poddosa. Fiat una dii de su mesi de cabudanni frisca meda, in sa praja no ddoi fut nemus e su soli fiat giai buddendi. Apalas, tenia is dunas de areni amesturadas cun su cràchiri chi fiant màncias birdis in cussu desertu stravanau. Ananti, castià conca a Pistis, cussa biddixedda fata e latziada comenti est oi etotu.
Sa dii mi-dd’arregordu de candu mi-ndi seu scidau. Sa nexi fut de is imbìdrius de sa domu de mari de ajaju, chi fiant tremi-tremi. Arrori, parriat movendi-sì su letu puru de su carraxu chi ddoi fiat. Is seti prus o mancu fiant e iant giai inghitzau s’esercitatzioni. Una bomba avatu de s’àtera, bastanti po si nai chi custu sonu inghitzàt a is seti de a mangianu e acabbàt a mericeddu. Bellu spàssiu, diessi!
Su celu fiat lìmpiu e craru, de unu bellu colori de asulu. Totu paris, ndi bessiant duus o tres aparèchius apalas de sa Turri de Flumentroxu. A candu bolendi artus, a candu parriant scudendi-si-nci a s’àcua de cantu fiant bàscius. Arribbànt curri-curri a Cabu Frasca e de chi fiant inguni si-ddoi spassiànt, a chini ghetàt bombas a chini sparàt. Torrànt a fai su giru e inghitzànt un’àteru bombardamentu.
No si naru su sonu. No asseliàst. Circàst de abarrai asuta de s’umbragu, giogàst cun su palloni, cun s’areni, cun babbu e mama. Ti-nci ghetàst a s’àcua ma fiast strobbau sèmpiri de custu sonu chi ti tzacarràt me is origas. Arribbàst a merii totu stronau. «Ih, ‘ta cosa bella, ant spaciau. Gei fiat ora, fiat!» fatu fatu naràst e aici parriat. Cussu cuartu de ora de paxi in su celu ddoi fiat poita ca is aparèchius depiant carriai torra totu is armas e sa benzina. «Eh, ita ti creis» iant pagau po sparai. Insandus, sparànt po bellu puru. E cun custa poesia si saludu deu:
Bombas
Frùsiant ocannu
Che abis in frori
Oja, ita dannu
Is aparèchius funt, arrori!
Nemus mùsciat,
Cumenti e chi mai.
S’ogu ddus càstiat,
Nudda ‘e si chesciai.
Arrespetu po nemus
mancu po tui, ìsula nosta.
No ddoi at meri sardu in su Cabu, ellus
Sa giustìtzia chi si-dd’at posta!
Est un’esca in terra
De bombas ghetadas!
E impari a is atras latziadas,
Nexi de sa gherra.
De su cincuantasès
Guvernat sa lei militari.
No ddu creis
Ca imbrutat terra e mari?
E ddoi sighint a totu dii,
Cun su frius e cun sa basca.
Scallant Cabu Frasca,
De mangianu a merii.
