Dexi contus in d-unu lìburu: Unu pipiu malu e àterus contus (2023) (1) chi Natascia Muscas e Alessandro Garau s’ant bòfiu arregalai. Sa genia est cussa chi ddi nant “arrorosa”, sa lìngua est su sardu campidanesu. Inghitzas a ligi pensendi de ti firmai allestru e invècias sighis ca is contus ti pigant e su sardu est bellu, currit beni. Is contus tenint arrèxinis fortis in su costumu nostu, ma sena de folclori; luegus connoscis is logus che cosa tua. Ligendi, ligendi ti benit de pensai a unu fil rouge chi potzat alliongiai totu is contus e forsis a sa fini dd’agatas puru. Po dda segai in curtzu, unu bellu lìburu chi candu acabbas de ddu ligi ti dispraxit ca t’at a mancai calincuna cosa.
(1) nalife.altervista.org/unu-pipiu-malu-e-aterus-contus/
Ndi paraus s’arrogheddu afatanti.
Cassa Manna, 2, pg. 54.
A Agìth ndi-dd’iat scidau unu sonu de passus asuba de sa folla in terra, e de nais truncadas. Pustis, iat intèndiu calincunu pispisendi. Cantu tempus fiat dormiu? No ddu sciiat, ma s’intendiat pasiau.
Si-ndi fiat pesau, e fiat essiu a foras de sa gruta. Su sentidu ddi naràt ca fiat sutzedendi càncua cosa. Tocàt a averiguai; depiat scoberri ita fiat. Si fiat incarau in sa baddi, e iat castiau a dereta e a manca, ascurtendi. Ddoi at genti, iat pentzau. Pustis si fiat postu luegus a curri, cara a su logu de aundi ndi beniant is sonus chi dd’iant strobbau
Agìth, mancai mannu e artu, teniat unu passu lestru e lèbiu tanti ca pariat chi giai giai is peis no dd’atumbànt a terra; povinas currendi meda, no fadiat sonu perunu. In tempus de pagu sartendi coras, arrius e arrocas, passendi in mesu de is prus matas mannas e a giru de is tupas, iat fatu unu tretu longu, e no si fiat firmau bàsciu de ai apubau de atesu un’omineddu piticheddu làngiu. Ddi fiat partu de ddu ai bistu fueddendi a solu, in su mentras chi fiat incruau, castiendi càncua cosa in terra, acanta de una tupa de ollastu.
Est un’arrùbiu, iat pentzau. A Agìth no ddi fiat mai pràxïa, sa genti de cuddu colori.
(…)
