Custa lìtera, che is chi ant a sighiri, est sa torrada de su Diretori de unu giorronali (no de custu chi seis ligendi) a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri fai una torrada unu pagheddu irònica e brullana…
ARRESPUSTA DE SU DIRETORI
A sa presidenti de sa Regioni Sarda – chistioni: speculatzioni energètica 2
de Giampaolo Pisu
Vossinnioria sa Presidenti stimada. Mi onorat meda su fatu chi apat torrau a scriri a mei avatu de pagu tempus asuba sa chistioni de sa speculatzioni energètica. Ma àtera genti de scriri no ndi tenit? Vossinnioria mi narat ca calincunu arresurtau dd’eis otentu: sa Corti costitutzionali at donau arrexoni a sa RAS po su chi spetat a is cumpetèntzias in contu de urbanìstica. Mi narat ca seis faendi una bella lei chi arrègulat sa chistioni… e su lìmiti a sa produsidura de energia no dd’eis postu? Ita? Scarèscius? Ma cumenti at essi! Ma ita si-ndi faeus de totu cuss’energia chi no teneus mancu indùstria? Ita? Vossinnioria est pensendi a su benidori?[1] Coment’est chi fiat cudda chistioni? Su tubu de scapamentu in domu nosta e sa màchina chi currit in àteru logu! Is nàdias callentadas a fogu! Mancu mali ca cussa lei at a firmai custus impiantus po 18 annus! Ita? Apu cumprèndiu mali?! No funt annus ma mesis? E ge no ant a abarrai totu is 800 pediduras giai presentadas de impiantus nous cun is 58GW de potèntzia? Ancu ddis pighit a scurrèntzia! Mi scriit ca cancunu s’est spantau ca s’eòlicu in mari po su Stadu no est cumpetèntzia de sa RAS? Ma candu mai! Is sardus gei si sciit ca timint s’àcua, piscadoris de stani, de còciula, marineris de fassoni, miga de navi, che is chi benint a si-ndi furai su pisci cun barcas mannas che palàtzius treullendi su fundali e sperdendi su logu. Vossinnioria sighit narendi ca est cuntenta chi is comitaus imoi siant medas, fortis e acunortaus! Ita? Ah, mi cunfessat ca perou imoi funt incarrerendi a ddi segai sa conca cun totu su carraxu chi funt faendi: Casteddu, Sacàrgia, Neapolis (Gùspini)… Poita no cuncordat cun s’assessori a su turismu “Su caminu de is turris (eòlicas)”? Mancai ddu podeis gemellai cun cussu de Santa Bàrbara: imbentaus su “turismu eòlicu”, tiraus de su bentu e sparaus a bòlidu!
Energeticamenti suu Su Diretori
[1] Futuro
