E gei fiat ora, Giampaolo (Pàulu po totus) Pisu nci-dd’at bogada s’arregorta de is contus cosa sua. Medas ant bintu prèmius de importu, àterus ddus connoscemus ca ddus iat publicaus bideas.org etotu, ma imoi ddus teneus totus impari, in d-unu lìburu chi fait a ddu ligi candu e aundi boleus. Contus spassiosus, po su prus contant su tempus de oi, modernus, scritus in d-unu sardu bellu e cun arrèxinis antigas.
fait a dd’agatai innoi: www.amazon.it/Imortali-%C3%A0terus-contus-Giampaolo-Pisu/dp/B0D8TY8N3Q
nci podeis ligi de dotoris presumius e trasseris, de unu scritori chi mancai assimbillat unu pagheddu a s’autori etotu e de genti strambeca in acuntèssius brullanus. Paraus su contixeddu afatanti chi si narat de una mama coidadosa diaderus.
Arrori in noti de lugori
Fut una bella noti de lugori, finas a candu no iat intèndiu cussu tzàchidu chi ndi-dd’iat scidada totu a una borta, faendi-ddi sprapeddai is ogus mannus mannus sena de cillus. Si fut castiada a parti e àtera circhendi de cumprendi ita totu fut sutzedendi. Sa dii innantis no iat papau nudda, e su scraxu fut incumentzendi a corroxinai po su fàmini, ma no fut pensendi tantu a issa ma a is fillixeddus, mischineddus, chi fiant ancora crescendi. Ddus iat lassaus in s’òru de su frùmini po si-nci ghetai a lestru a s’àcua, mancu mali ca nasciant ca sciiant giai anadai. Is tzèrrius disisperaus de sa genti preniant de arrori sa noti. Su torrocu mannu de su tzàchidu, sighiu de is lìnguas de fogu, no nd’iant scidau scéti a issa ma totu sa giungla. Sa barca manna de piscadoris oramai fut cundennada, e aici medas òminis pesaus a bolai e scavuaus a s’àcua che arrogus de linna.
Su logu fut totu treullau e ghetau apari, cun sa genti ancora bia totu avolotada e sprixuriada. Fogu, callentori e disisperu preniant cussa noti maradita, s’araxixedda lèbia portàt su fumu sciàmia sciàmia che spìritu baddendi. Is facis prenas de arrori chi si biiant de atesu, mancai su fumu, dd’iant cumbinta ca depiat fai calincuna cosa, a prus che po issa, po is fillus: issa fut una mama atenta chi ddus boliat pesai comenti si spetat. Iat a ai bòfiu prangi calincuna làmbriga ma no ddoi fut tempus; aici cun su sòlitusànguni fridu si fut fata: “Ge apu a acudi apustis de chi mi-ndi papu una pariga“. Aici mama cocodrillu nci fiat acabbada de lissiai in s’àcua scoita scoita conca a cussus piscadoris malassortaus…
