Mèrcuris su 21 de làmpadas 2023 est sa prus dii longa e sa prus noti curtza de s’annu in s’emisfèriu de setentrioni; de innoi cumentzat s’istadi astronòmica. A is 4:57 de a merii su soli lompit a su prus puntu artu e setentrionali in su celu, est a nai ca su polu nord est prus acanta a su soli. Su fueddu ndi benit de su latinu “solstitium”: “sol” e “sistere”: soli chi si firmat, po inditai ca, in custa dii, su soli est comenti e chi si firmit unu pagheddeddu de prus in su celu sena de ndi bolli calai. Is diis crescint sèmpiri de prus a partiri de su solstìtziu de ierru, sa luxi duncas bincit su scuriu e sa potèntzia sua callentat totu sa terra. Su solstìtziu de istadi po is pòpulus de totu su mundu est momentu de passàgiu, candu lassaus agoa sa cosa bècia po andai faci a su benidori. Est tempus de messai, de incùngia, de fai festa a spadàgius, ballus e fogadonis. Est su tempus de sa fertilidadi e de s’abundàntzia.
Su prus sìmbulu de importu in custa dii est su fogu chi inditat luxi contras a su scuriu, fortza e callentori. In sa cristianidadi su solstìtziu est acapiau a su nascimentu de Giuanni Batista. A sa noti intre su 23 e su 24 ddi nant “sa noti de su fogu” ca in dònnia logu alluint fogadonis mannus po abruxai sa cosa bècia, binci su scuriu, annuntziai ca Gesugristu est arribbendi po nci bogai de sa terra su nieddori de s’Inferru e fai binci su beni contras a su mali.
In Sardìnnia puru su solstìtziu de istadi e sa festa de Santu Giuanni Batista funt de importu mannu. Dònnia bidda tenit su fogadoni cosa sua. In custa noti totu pigat poderi, s’àcua po nai e is erbas; aici, a logus, sa genti si sciundit in is funtanas e arregollit erbas po fai mexinas. Tocat tambeni a donai atentzioni, ca is cogas puru bessint po andai a circai su chi ddis serbit po is bruscerias e is mazinas insoru.
Una bella manera po si gosai su solstìtziu est su andai a biri su scurigadòrgiu de unu bellu nuraxi, postu in d-unu cùcuru cun d-una bista de spantu. Po custu Genn’’e Mari de Biddanoa ‘e Forru no est certu logu de lassai a banda.
