Vèneri atòbiat a Cèreri e Giunoni

Raffaelo Sanzio, Lolla de Psichi: Cèreri e Giunoni – de Wikipedia

Cupidu no at fatu su chi Vèneri dd’iat cumandau, ma bista cantu fiat bella Psichi si-dda fiat pigada che sposa. Candu si-ddu narant, Vèneri s’arrennegat de mala manera e, bessia de domu foras de sentidu, atòbiat a Cèreri e Giunoni chi circant de dd’apasiguai.

Paraus su contu e sa màgini de Vèneri chi atòbiat a Cèreri e Giunoni

Su Burricu de oru, Lìburu V, 31

Acabbau de chistionai, ndi stupat a foras arrennegada, carriendi feli, comenti Vèneri sceti podit fai. Imoi etotu alloddu a Cèreri e Giunoni chi, arribbendi ananti suu e biendi-ddi sa faci unfrada, dda preguntant poita cudda cilla disapiadada dd’arruinit is ogus aici bellus e luxentis. E issa: “Seis arribbendi in s’ora giusta” si fait “s’ànimu miu est abruxendi-sì e bosàteras podeis apanniai su disìgiu chi ndi benit. Ma, po sa caridadi, circai cun totu sa fortza chi teneis a cudda Psichi chi si-nd’est fuia e no s’agatat. Connosceis beni is contus chi girant apitzus de domu mia e de totu su chi at cumbinau cuddu chi no depu sighiri a ddi nai fillu”.

Intzandus cuddas, chi sciiant totu de su chi fiat incapitau, circant de asseliai su feli arrabiosu de Vèneri, e aici ddi nant: “Sa meri, ita totu de mali at fatu fillu tuu ca ti ponis contras a su gosu cosa sua cun abbètia manna e ses circhendi puru de mandai in oramala sa chi issu stimat. Ita disacatu, ti pregaus, su d’essi scaringiau un’arrisixeddu a una piciochedda galana? No ddu sciis ca est mascu e giòvunu, ti ses scarèscia de s’edadi sua? No at a essi ca sighis a ddu biri che pipiu, ca portat beni is annus chi tenit? Tui chi ses mama e fèmina assentada puru, bolis sighiri sèmpiri a scrucullai crosidadosa su spàssiu de fillu tuu e a dd’incurpai po s’afròddiu chi tenit? E dd’as a murrungiai totu is fèminas e as a streulai a unu fillu aici bellu po is chi funt s’arti e su gosu cosa tua? E chini de is deus, chini de is òminis at a baliai chi tui, chi spartzinas innoi e innia s’afròddiu de is pòpulus, potzas ponni barrancus a cuddu de domu tua e serrai sa butega pùblica de is fìtzius de is fèminas?”. Aici cuddas, timendi is frècias suas mancai no nci fessit, carinniànt a Cupidu po si-ddu ingratziai. Ma Vèneri, inchietada ca cuddas pigànt a giogu s’afrenta cosa sua, ddis iat furriau palas e, totu arrennegada, iat incarrerau conca a mari a passu lestru.

Innoi fait a agatai puru is versionis originali e italiana

Sighit: Vèneri e Giovi