Magini: Heinrich Bürkel (1802–1869), Su malloru e su pintori (1 e 2).
Sa noti Heinrich iat dormiu pagu, cussa bidea sighiat a ddi furriai in conca e no biiat s’ora de si-ndi pesai. A mengianu si-ndi fiat pesau a chitzi, iat papau a lestru unu cicaroni de lati e pani tostau, iat saludau a sa mama, iat pigau pinzellus, coloris e cuaddu de linna e si-ndi fiat bessiu. A luxi de spanigadroxu s’àiri fiat crara, su pardu a colori de smeraldu e is bacas… totu cussas bacas pascendi assèlias, ca su tempus inguni fiat firmu e no nci fiat cosa de fai in pressi. No boliat perdi nimancu unu minutu de cussa magia chi duràt aici pagu. Su soli, pesendi-sì de monti, iat a essi portau sa luxi e su callenti de làmpadas e sa dii iat a essi pigau is coloris trullus de istadi. Cussa emotzioni dda boliat firmai in sa pìntura ch’iat inghitzau de unas cantu diis, ponendi-nci imoi cussu nidori traluxenti chi nisciunus mai si fiat pòtziu gosai innantis.
Iat strantaxau su cuaddu, iat apariciau is ainas e si fiat sètziu a pinzellu in manu, candu totinduna iat intèndiu unu murigu nou, unu corrinai surdu, cosa manna chi si moviat conca a issu. E arratza de atzicu chi ndi-ddi fiat bènniu a sa vista de su malloru mannu chi si fiat acostendi a bellu a bellu. E s’atzicu si fiat furriau luegus a sprama candu si-ndi fiat acatau de totu s’arrùbiu ch’iat postu in sa pintura. Lestru che guetu si fiat apiculau a sa mata chi nci fiat inguni acanta e si fiat sètziu a pitzus de una nai. Su malloru si fiat firmau, dd’iat castiau forsis preguntendi-sì chini fiat cuss’òmini e ita nci faiat inguni. Su pintori, cun is cambas pendi pendi, fiat abarrau firmu aundi fiat, abetendi su boinàrgiu po si-di podi torrai a domu.
(1) en.wikipedia.org/wiki/Heinrich_B%C3%BCrkel
(2) de Didatticarte: www.facebook.com/www.didatticarte.it
