ARRESPUSTA DE SU DIRETORI
A sa presidenti de sa Regioni Sarda – chistioni: speculatzioni energètica 6
de Giampaolo Pisu
Vossinnioria sa Presidenti stimada, biada a chini Dda torrat a intendi! Ge ddu sciit ca mi fait sèmpiri prexeri su arriciri una lìtera de Sa Mertzei, mancai a bortas… ma assumancu a scriri a Vossinnioria no arriscu sa vida comenti e candu dd’apu fatu cun Putin o Trump: pensit ca mi seu dèpiu fai un’asseguratzioni po sa vida spetziali, ca unu m’at nau ca de is chi dd’ant scritu no nd’at abarrau biu unu, e s’àteru naca mi-nci fai portai a Marte cun su razu de Elon Mask (Maskellon po is amigus) cun totu is comunistas, caghineris e ecologistas, a spacai arroca martziana a picu: cessumamamiatiarrori! Mi scòviat in cunfiantza ca est disisperada! Ca no sciit a cali manu si donai: est andendi totu mali: dd’iant a bolli fai dimiti po cussa chistioni de sa torradura de contus de sa campànnia eletorali! Sa sanidadi no funtzionat, e coment’e chi no bastàt, imoi su guvernu at impunniau sa lei “aree idonee”, sa giustìtzia! De mali in peus! Chi andat a mari mancu àcua agatat! Naca calincunu est incarrerendi a acostai Vossinnioria a sa Gazosa chi faiant in Abas[1]? Arrori!
Mi narat ca imoi dd’at diaveras arròsciu custu Stadu abbetiosu e prevaricadori chi bolit fai su meri in domu allena! Po sa lei impunniada de su guvernu naca imoi depit fueddai cun su ministru Picchetto FRA’ TIN, e ge si-dda cantat! Mi narat ca unu para chi fait su ministru depit cumprendi amarolla, ca est òmini de Deus! Nossi castit ca est sballiendi, su ministru no est unu para, mancai aici potzat parri de su sangunau, podit essi mancai unu para-culu, custu no ddu sciu e no mi permitu de ddu nai! E no si fatzat cumbinci de cussu incantabovus faendi-sì promiti in donu peruna arratza de “VASELLINA DE STADU” po custa SPEINCULATZIONI!…
Ma chi no at funtzionau custa lei “aree idonee”, comenti sciiat su burricu puru, perdonit chi ddu nau, poita no provat a pigai in cunsideru sa proposta de lei Pratobello? Ita? Su Stadu no iat a arreconnosci mancu custa? Podit essi! Ma a detzidi innoi puru iat a essi sa corti costitutzionali, e sigumenti sa lei Pratobello sa chistioni dd’arrexonat comenti de “matèria urbanìstica” anca sa Regioni tenit cumpetèntzia primària, no si sciit… dd’apu a crei chi Vossinnioria no tèngiat perunu “santu in corti”?
Pratobellamenti suu Su Diretori
[1] In Abas (Ales) ddoi fut sa dita Todde chi produsiat gazosa.
