Su Cruculeu e su Lèpuri

Caiu Giùliu Fedru, nàsciu in d-unu annu faci a su 15/20 innantis de Gesugristu e arribbau a Arroma de sa Tràcia che scrau giovuneddu, iat scritu paristòrias meda, sighendi su tretu de s’aregu Esopu. Ndi paraus sa de noi, in versus e in prosa.

Lìburu I – Paristòria IX: Su Cruculeu e su Lèpuri

Consillu est scimpru a is àterus donai
Ni s’incurai de sei. Dd’amostu imoi
Intre is farranca’ ‘e Àchili su Lèpuri
A forti s’ chèsciat. Aici si-ddu befat(a)
Su Cruculeu: prus, lèbiu no as a curri?
E poita tenis is peis aici grais(i) ?
Ancora chistionendi, allò su Stori
Dd’agafat e chescendi-sì ddu bocit(i)
Acanta puru de spira su Lèpuri
Chi allenu dannu dongat acunortu
Tui chi seguru, narat, mi befàst(a)
Cun pròpiu dolu sorti tua imoi prangis(i)

No s’incurai de sei etotu e donai cunsillus a is àterus est cosa de scimprus: si-dd’amostu cun pagus versus.
Su cruculeu befàt su Lèpuri ca s’Àchili dd’iat agafau e prangiat a corròxinu: “Ita totu” ddi fait “de su curri tuu aici lestru? E poita tenis is peis aici grais?”. In s’interis chi est chistionendi, su Stori dd’abbrancat de suncunas e ddu bocit, mancai sigat a tzerriai e a si chesciai debbadas. Su Lèpuri, respirendi a traballu: “Labai, mòrgiu assèliu. Tui chi imoi pag’ora, sena de ti pistighingiai, ti nd’arriiast de sa sorti mia mala, imoi, cun chèscias che is mias, prangis su distinu cosa tua”.

Innoi fait a ligi is scritus, originali e italianu
Innoi fait a ddu ligi in inglesu puru