ARRESPUSTA DE SU DIRETORI
a Donald Trump2
de Giampaolo Pisu
Vossinnioria Maestà, mi spantat diaveras su arriciri un’àtera lìtera de Fostei! Cun totu su chi m’at scritu s’ùrtima borta! Ah! Dd’assèliat is nèrbius fintzas prus de su stentu chi ddi praxit de prus: biri is piscicanis in sa piscina de domu papendi-sì is messicanus chi intrant a fura in is Stadus Unius! Ma ge at a essi brullendi speru? Eja? Mancu mali! Comenti? No funt scéti messicanus, ddoi at fintzas colombianus, haitianus… cun Deliveroo si-ddus portant a domu giai prontus? Cessumamamiatiarrori! Vossinnioria Maestà incapas mi scriit po provai a s’allebiai sa cuscièntzia po totu custus arroris. Ah… cuscièntzia no sciit it’est! E sa gherra in Ucraina? Ge dd’at afraddocau a cussu pòburu Presidenti Ucrainu! Dd’at lìgiu sa vida! Sbregungiu in mundu-bisioni e bogau a sonu de corru! Cuddu mischineddu, sèmpiri bistiu de cassa manna, comenti narat Cullin, at fatu totu su chi at fatu seguru de essi acotzau de s’Amèrica e imoi s’agatat a culu in terra! E mancu mali ca at arriciu solidariedadi de su batallioni nazista Azov!
Vossinnioria Maestà mi narat ca sa chistioni de sa gherra, chi bolint si-dda scroxat s’Europa! Tocat a dd’arreconnosci ca assumancu po su chi spetat a custa chistioni calincuna beridadi mi parrit chi Vossinnioria Maestà siat boghendi-nde-dda a pillu; avatu chi Biden e is amighixeddus cosa sua s’iant prenu de fàulas chi is guvernatis europeus ant bòfiu crei, ca ge ddu scieus ca issus tenint “su mali de sa lìngua longa”, ma no po fueddai, po lingi culus prus a prestus, chi est portendi totu s’Europa a s’arruina e su sciusciu! E Imoi, comenti narat Travaglio, spaciaus is culus de lingi, no sciint prus a cali manu si donai chi no a furriai a un’economia de gherra totu s’Europa!
Permitat-mi-dda, ma sèmpiri aici faeis bosàterus americanus? Innantis promoveis una gherra, agiudais sa parti chi si cumbenit donendi-ddi armas, e candu dd’arrosceis, ca mancai no si cumbenit prus o cambiais presidenti, si-ndi andais lassendi su logu totu treullau e ghetau apari: VietNam, Amèrica Centrali, Orienti de Mesu, Afganistan, Irak… E comenti’e paga po s’Europa chi at sèmpiri incrubau sa conca (o fiat su paneri?) dd’at nau ca est parassita e at amaletzau dàtzius a su 25%? Arratza de faci? No mi seu poderau de si-ddu scriri e chi detzidit de mi ghetai una bomba cun su nòmini miu o mi-nci portai a Marte a spacai arroca martziana a masseta e puntarola cun su razu de Elon Mask, comenti m’iat nau cun s’àtera lìtera, passièntzia! E Fica-si-nci in sa bassa, Vossinnioria Maestà e cussu drogau de Maskellon! E ita stocada! Candu nci bolit nci bolit!
Maestosamenti suu Su Diretori
Custa lìtera, che is chi ant a sighiri, est sa torrada de su Diretori de unu giorronali a is ligidoris-as. Is lìteras a bortas funt beras e a bortas imaginàrias (che custa) is nòminis puru a bortas funt imbentaus po chistionis de privadesa. Su diretori, candu si-ddu minescint, si pigat su stentu e de seguru su prexeri de fai una torrada unu pagheddu irònica e brullana…
