Màgini: Ausu, Maistru Venceslao, 1352-1411, de Wikipedia.
furriau in sardu de:
Ugo Dessy, Su tempus chi passat, Vol. I, S’annu de su messaju, Alfa Edirice, 1989, pg. 90.
www.alfaeditrice.it/shop/collane/su-tempus-chi-passat
www.ugodessy.com
Austu
Austu, ùrtimu mesi de s’annu, chi in sa segundu medadi donat a su messaju unu pagu de pàsiu, giustu su tempus po torrai a pigai sùlidu innantis de s’inghitzu de capudanni.
Is fieras de su bestiàmini – de importu mannu is de Santa Cruxi in Aristanis e de Santu Austinu in Pauli Arbarei – ddas faiant intre s’acabbada e s’inghitzu de s’annu agràriu. Aici etotu is mercaus, aundi is fèminas rennovànt su frunimentu de domu, de is ainas de coxina a is lentzorus, a is tiallas, po dd’acabbai cun is bistiris, e is messàjus e is pastoris comporànt ainas noas de traballu, picus e marras, pitajolus, sonallas po is brebeis: totus tenint sonu diferenti, ma impari funt acordaus a manera de ndi bogai una sinfonia de sonus chi fatzat connosci cussu tallu de totu is àterus. In s’acabbada de austu nd’arribànt puru is prus festas nodias de is biddas, candu millenas de fielis acurriant de dònnia parti de s’ìsula po s’atobiai in is pratzas mannas ananti de is santuàrius dedicaus a is santus. Inguni sciolliant is votus po gràtzia arricia, papànt is durcis de su santu e petza de angioni e crabitu arrustia in su sartu, bufànt binu meda, cussu nieddu forti de Campidanu e cussu biancu fritzantinu de monti e baddànt e cantànt a su sonu de is launeddas, aina musicali a tres cannas, chi ndi benit de su prus antigòriu mannu.
