de Danix Sanna
In su calendàriu s’agàtant unas cantu festas chi dònnia annu bessint in d-una dii diferenti. S’arrexoni est chi custas festas funt acapiadas a sa dii de Pasca Manna chi bessit a segunda de sa luna prena.
Comenti mùdat sa dii de Pasca Manna
In su primu concìliu de Nicea (annu 325) sa Crèsia iat detzìdiu chi sa dii de Pasca Manna fiat su domìnigu apustis de sa primu luna prena de Beranu. Po custa arrexoni sa dii de Pasca Manna, a segunda de is annus, podit capitai de su 22 de Martzu a su 25 de Abrili. Poneus chi su 21 de Martzu (sa primu dii de Beranu) est de luna prena, Pasca Manna est su primu domìnigu apustis de custa dii e duncas podit bessiri de su 22 a su 28 de Martzu; invecis candu su 20 de Martzu est de luna prena, sa primu luna prena de Beranu est su 18 de Abrili (29 diis a pustis), e duncas Pasca Manna podit bessiri de su 19 a su 25 de Abrili.
Còmputu de sa dii de Pasca Manna 2024
Po sciri sa dii de Pasca Manna 2024, sa primu cosa de connosci est chi su 25 de Martzu nci teneus sa primu luna prena de Beranu, chi est de Lunis. Duncas, sendi chi Pasca Manna est su Dòminigu a pustis, in su 2024 Pasca Manna bessit su 31 de Martzu, e sa Pasca de S’Àngiulu est sa primu dii de Abrili.
Festas acapiadas a sa Pasca Manna
Su Mèrcuris de Cinixu est 46 diis a innantis de Pasca Manna, mentras su domìnigu apustis est su primu Domìnigu de Carèsima.
Innantis de Mèrcuris de Cinixu benint is festas de su Carrasciali: Giòbia Lardajolu, Domìnigu de Carrasciali e Martis Lardajolu.
Su Sinnadroxu de Gesùs est 39 diis apustis de Pasca Manna, chi bessit de giòbia, ma de su 1977 in Itàlia custa festa da faint su domìnigu infatu, est a nai su de 6 domìnigu apustis de Pasca Manna.
Su Spìridu Santu est su de 7 domìnigu apustis de Pasca Manna mentras Sa Trinidadi est su de 8 domìnigu apustis de Pasca Manna.
Su Corpus Dòmini est 60 diis apustis de Pasca Manna, chi est de giòbia, perou de su 1977 in Itàlia dda faint su domìnigu infatu, est a nai su de 9 domìnigu apustis de Pasca Manna.
Festas de Carrasciali
(o Carnevali, Carri a segai, Segada de petza, Carr’a segare, e aici nendi)
- 08/02/2024 Giòbia Lardajolu (Giovedì grasso)
- 11/02/2024 Domìnigu de agoa o Domìnigu de Carrasciali (Domenica di Carnevale)
- 13/02/2024 Martis de agoa o Martis Lardajolu (Martedì grasso)
Calendàriu de Carèsima e de Pasca Manna
- 14/02/2024 Mèrcuris de su Cinixu, 46 diis innantis de Pasca Manna, cumentzu de sa Carèsima
- 18/02/2024 Primu domìnigu de Carèsima
- 25/02/2024 Segundu domìnigu de Carèsima
- 03/03/2024 Su de tres domìnigus de Carèsima
- 10/03/2024 Su de cuatru domìnigus de Carèsima
- 17/03/2024 Su de cincu domìnigus de Carèsima
- 24/03/2024 Domìnigus de is Pramas
- 28/03/2024 Giòbia Santa, s’Úrtimu Cena, acabbu de sa Carèsima
- 29/03/2024 Cenàbara Santa, sa morti de Gesùs
- 30/03/2024 Sàbudu Santu
- 31/03/2024 Pasca Manna
- 01/04/2024 Pasca de s’Ángiulu
- 12/05/2024 Su Sinnadroxu de Gesùs o Pasca de s’Ascensioni, su de 6 Domìnigu apustis de Pasca Manna (Ascensione di Gesù)
- 19/05/2024 Pasca de su Spìridu Santu o Pasca de is Froris, su de 7 Domìnigu apustis de Pasca Manna (Pentecoste)
- 26/05/2024 Sa Trinidadi, su de 8 Domìnigu apustis de Pasca Manna (Santissima Trinità)
- 02/06/2024 Corpus Dòmini, su de 9 Domìnigu apustis de Pasca Manna (Còrpus Dòmini)
