Sa dii de s’aciapa

Anonymous – Prise de la Bastille – Versailles

Casteddu, su 28 de abrili 1794

Apustis cuàturu sèculus de dominatzioni e de feudalèsimu aragonesu-spanniolu, sa Sardìnnia est pòbura de no crei. Imoi funt prus che 70 annus chi is piemontesus guvernant s’Arrènniu de Sardìnnia chentza de s’incurai de su benistai de is sardus, ma antzis pighendi-ddus de mala manera, primendi-ddus e pensendi sceti a s’arricai issus etotu. Sa genti no ndi podit prus.

Su 28 de gennàgiu de s’annu innantis is navis frantzesas iant inghitzau a bombardai Casteddu e su 14 de friàrgiu is sordaus fiant sbarcaus in sa plaja de Cuartu. S’urrei Savoia no nc’iat nimancu provau a difendi s’ìsula e fiat stètiu s’esèrcitu sardu ghiau de Gironi Pitzolo e Bissenti Sulis a ddus aguantai e a nci scavulai is francesus a mari. In s’interis s’afracada puru de sa flota frantzesa, ghiada de Napoleoni Bonaparte, a s’ìsula de Sa Madalena fiat stètia unu fallimentu. Afortiaus de custus arresurtaus, in su mesi de cabudanni de su 1993, is delegaus de is Stamentus sardus iant portau a Torinu unas cantu pediduras po circai de adelantai is cunditzionis de is sardus, ma no ddis iant nimancu torrau sceda.

S’arrennegu est duncas mannu meda candu arribbat a Casteddu sa nova ca ant arrestau a Bissenti Cabras e a Bernardu Pintòr, duus abogaus liberalis chi iant fatu nasci su chi ddi narànt “partidu patriòtigu”. Totindunu su pòpulu si fùrriat: trumas pesant a Casteddu de susu, is campanas de is apendìtzius de Stampaxi, Lapola e Biddanoa arrepicant, tzerriendi sa genti po nci bessiri de domu, sa defensa de s’esèrcitu est pagu cosa. Is revolutzionàrius agatant a su visurrei Balbiano cuau in su Palàtziu de s’arciobispu e dd’arrestant, e cun issu is prus ufitzialis mannus cosa sua. Inghitzat sa circa de is piemontesus; po connosci chi fulanu est sardu o piemontesu, candu ddu fimant ddi narant: “nara cìxiri”; est Sa dii de s’aciapa. Nd’agatant 514 e ddus inserrant in su presoni de Santu Francau e in d-unus cantu cumbentus. Su 7 de maju ddus portant a su portu e ddus faint partiri a Piemonti.

Acapiau agatais su scritu in italianu puru

Mitzas:
R. Carta Raspi, Storia della Sardegna, Mursia, 1971-1977, pp. 780/798
www.quartourismo.com/2021/04/26/sa-die-de-sa-sardigna-i-vespri-sardi-del-1794-1796-parte-i/
truncare.myblog.it/2020/04/20/ricordare-sa-die-de-sa-sardigna/
it.wikipedia.org/wiki/Sa_die_de_sa_Sardigna
albertomassazza.wordpress.com/2014/02/22/sa-die-de-sacciappa-sardegna-savoia-rivolta/
sardegnamondo.eu/2015/04/27/sa-di-de-sacciappa-2/