Su sciacu de sa pesta fiat durau cuàturu annus, de su 1652 a su 1656, ma a sa fini, po gràtzia de Deus, fiat acabbada. S’11 de su mesi de argiolas de su 1652, e agoa in su 1656, sa Municipalidadi de Casteddu iat fatu votu a Sant’Efis po chi essit intecèdiu po sa saludi de is sardus. In su 1657 Casteddu, po ddu sciolli, iat apariciau una prucissioni comenti no nd’iant bistu mai. De insaras funt 368 annus chi Sant’Efis partit de Casteddu po andai a Nora, aundi dd’iant degollau. In su 1943 puru, asuta de is bombas, is casteddajus no iant bòfiu fai de mancu de fai su doveri insoru.
Su primu de maju su santu, apitzus de su carru a bois, ndi bessit de sa crèsia sua, in Stampaxi. Ddi andant ainnantis is tracas (carrus a bois) allichidias a festa, is trumas a costumu de totu is biddas de s’ìsula, is cuadderis de Campidanu, is militzianus (sa guàrdia a cuaddu), s’Alter Nos (chi rapresentat su sìndigu). Dd’acumpàngiat s’Arcicunfraria de su Gonfaloni e ddu sighint is fielis. Apustis de prus che 60 chilòmetrus de biaxi e de essi imbucau in Su Loi (Cabuterra), Villa d’Orri (Sarrocu), Santu Perdu, Nora, su 4 de maju Sant’Efis torrat a Casteddu e, innantis de mesunotis, imbucat a crèsia aundi su Presidenti de s’Arcicunfraria decrarat chi su votu est sciòlliu. A s’acabbada de sa tzirimònia is cunfraris intonant is gòcius in onori de su Santu.
https://www.youtube.com/watch?v=Yube9mjz4zY
Mitzas:
https://meandsardinia.it/santefisio-il-guerriero-che-libero-la-sardegna-dalla-peste/https://www.vistanet.it/cagliari/2023/05/01/video-e-foto-1-maggio-1943-santefisio-nella-cagliari-bombardata-i-cagliaritani-sciolgono-il-voto-nonostante-tutto-rep-2/https://it.wikipedia.org/wiki/Sant%27Efisio
https://www.fondazionesardinia.eu/ita/?p=17437
