Màgini de crobeca pigada de Pixabay
Duas bortas a s’annu sa dii durat giustu doxi oras in totu sa Terra, su soli allùmiat is duus emisfèrius a sa pròpiu manera. S’ecuinòtziu de beranu ddi ferrit ocannu su binti de martzu, su soli bessit a orienti precisu e calat a ocidenti precisu, acabbat ierru e inghitzat beranu. Est dii de allirghia ca sa luxi est giai meda ma at a amanniai ancora, finas a lompi a su soli mannu de su solstìtziu de istadi.
Sa stasoni noa est portendi energia e briu, is matas pillonant, su sartu pigat dònnia colori, s’àiri est callentendi-sì. Pasca manna arribbat su primu dumìnigu apustis de sa luna prena chi sighit s’ecuinòtziu de martzu e inditat a is cristianus ca cun sa natura torrat a nasci sa vida, e comenti su soli bincit su scuriu, su frius e sa noti, aici su beni bincit su mali.
![](https://i0.wp.com/bideas.org/wp-content/uploads/2024/03/Foto-COPERTINA-Wordpress-2023-03-17T080232.206.jpg?resize=300%2C169&ssl=1)