Un’àtera bella cantzoni a curba piagada de sa comèdia “Sa coja de Pitanu” de su Canònigu Luigi (Luisu) Matta.
Càstia puru: “Is duas arrosas”
Sa cantzoni de s’angionedda.
1.
S’angionedda mia bella Conchemoru
po cantu apu a bivi m’at a arregordai,
dda tenemu cara… prus cara de s’oru!
Ma beniu est margiani a mi-ndi-dda furai.
2.
De mi-ndi furai s’angionedda mia
non mi-ddu aspetamu in s’annada di ocannu,
i a mesudì in puntu e send’essi dormia
basciu s’umbra frisca de s’orroli mannu!
Ah… si cussu ingannu chi tui m’as portau
mi dd’essit sulau su topi a s’origa
crei chi sentza briga, margiani pudèsciu
no fiast arrenèsciu mancu a dda tocai.
3.
Non fìast arrenèsciu? Ellu!… ita ti creis
de essi prus astutu de tot’is margianis?
Ti ses campaniau candu in is brebeis
su meri mancat(a) impari cun is canis.
Mellus chi t’intanis margiani in sa gruta;
si m’arruis asuta, s’angioni dda smàrigas,
mancai portis càrigas fìnis po s’arrastu,
marigosu pastu ti dongu a tastai.
4.
Ti dongu a tastai su fusti o su latzu.
Sèmpiri ti creis chi deu ap’essi atesu?
Si in is pungas m’arruis, iscìs ita ti fatzu?
T’atripu a sa schina e-i ti dda truncu in mesu.
Sciu chi ses avesu a bivi in is cresuras,
comitendi furas po brafanteria,
là! s’angionedda mia dda pagas a caru,
sa dii chi t’imparu s’arti de ciapai!…
5.
Sa dii chi t’imparu sa professioni,
marranu! no torras po un’àteru pegus?
dd’as fatu su spantu ch’as bintu un’angioni,
brafanteri torra, ca giogas cun megus,
a is lanas di asegus creimi ca ti pigu,
cun d-unu sartigu t’infrissu su bruncu,
t’apiccu a unu truncu cun custa scritura:
culpa de sa fura s’est fatu impicai.
6.
Culpa de sa fura mortu est in furca.
E fatu dd’at morri s’ofèndiu pastori,
si no est chi ti fatza giustìzia turca.
Mai prus iscramentas de essi ingannadori
margiani traitori! Pagas fintzas cuddas
dexi o doxi puddas de signor Fulanu!…
Si nci pongu manu, ti sperdu s’arratza
e margiani a pratza non ci as a torrai.
7.
E, margiani, a pratza non nci torras prus,
de m’essiri a tretu mira chi t’atzardis!
De pònniri a curri pensu chi ritardis,
no intzurpas prus mardis po tenni is porceddus,
ni prus angioneddus furas de sa corti
e nen prus sa morti ti fingis po spassu,
poita no ti lassu sentza ti scroxiai.
8.
Sentza ti scroxiai?… ti circu in su logu
aundi custa cida t’as fatu sa tana.
De murdegu friscu ti nci apuntu fogu
po chi de furai ti passit sa gana
si bessis, s’artana incontras preparada.
S’angioni furada, crei-mì chi dda smartis!
Si no est chi t’apartis de custu cuili,
su mesi de abrili no dd’as a contai.
9.
No dd’as a contai, ma sa morti tua…
ah, cust’est sa boxi de s’angioni mia!
Mi parit de biri sa figura sua…
it’at a essi giogu de sa fantasia?
It’at a essi bia? Ma no chi est’ingannu!
Filla de s’afannu est cust’illusioni,
chi parit s’angioni cuntenta e prexada,
de flocus mudada e prus bella che mai.
10.
De flocus mudada e cun cudda cannaca
de velludu in seda e-i su sonaiolu…
e hai! cantus borta sètziu in sa baraca
dd’apu bista aici sendi solu solu
mi fiat che consolu su dda biri andendi,
e in s’erba gioghendi sentza timoria!
Si sa boxi mia po pagu intendiat,
sùbitu curriat po mi frandigai.
11.
Sùbitu curriat fendi-mì frandigu,
si trantzemu is passus, fiat avatu miu
o circhessi s’umbra, o su campu o s’oprigu,
in boscu, in pianura, in sa mitza, in s’arriu.
O scidu, o dormiu, dda portamu in peis:
lassada in brebeis po mi benni accanta,
totus mi narant(a): Mira chi s’angioni,
margiani ladroni ti-nd’at a furai.
12.
Ti-nd’at a furai (pòberu de mei)
cust’avertimentu no bolemu intendi.
Però custu pràngiu (gei mi dd’emu a crei)
su mellus chi stamu in s’arròliu cantendi,
sendi issa dormendi in su riscu fidada,
sentza essi billada mancu de su cani.
D’aferrat margiani e in mesu sa corti
dormendi sa morti dd’at fata provai.
13.
Dd’at fatu provai, ma po prus dolori,
a dònnia momentu parit chi dda bia
notesta sighendi un’àteru pastori,
su cali si befat de sa sorti mia.
Angioni atrevia si cussu m’as fatu,
crei-mì chi ti tratu comenti merescis
e in forma chi crescis in manus allenas,
doloris e penas non t’ant a mancai.
Màgini de Pixabay
